خۆپیشاندانه‌كان له‌ توركیا بۆ رۆژی چواره‌م به‌رده‌وامه‌و فراوانتر ده‌بێت

جیهان
10:52 - 2025-03-22


خۆپیشاندانه‌  ناڕەزاییه‌ جه‌ماوه‌رییه‌كان لە تورکیا دژبه‌ دەستگیرکردنی ئەکرەم ئیمام ئۆغڵو سه‌رۆكی شاره‌وانی ئیسته‌مبوڵ و سه‌ركرده‌ی دیاری پارتی كۆماری توركیا(جه‌هه‌په‌) تادێت فراوانتر ده‌بێت و ئاڵۆزیی و توندوتیژیی زیاتری لێكه‌وتووه‌ته‌وه‌و به‌هۆیه‌وه‌ ژماره‌یه‌كی زۆری خۆپیشانده‌ران له‌لایه‌ن هێزه‌ ئه‌منییه‌كان ده‌ستگیركراون و به‌پێی سه‌رچاوه‌ رۆژنامه‌وانییه‌كان و رێكخراوه‌كانی مافی مرۆڤ، ژماره‌یه‌كی دیكه‌ش كوژراون و برینداربوون، سه‌رۆكی توركیاش رایگه‌یاند كه‌:"ته‌سلیمی تیرۆری سه‌رشه‌قام نابن"

به‌پێی سه‌رچاوه‌ رۆژنامه‌وانییه‌ جیهانییه‌كان و ئه‌و ڤیدیۆیانه‌ی له‌ تۆڕه‌ كۆمه‌ڵایه‌تییه‌كان بڵاوكراوه‌ته‌وه‌، له‌ شاره‌كانی ئیسته‌نبوڵ و ئه‌نقه‌ره‌و ئیزمیرو ئورفه‌و عه‌نتاب و پۆلۆو بۆرسه‌و هاتای و ته‌رابزۆ و چه‌ندین شاری گه‌وره‌ی توركیا خۆپیشاندان بۆ رۆژی چواره‌م به‌رده‌وامه‌و خۆپیشانده‌ران دروشمی روخانی دیكتاتۆر ده‌ڵێنه‌وه‌و داوای هه‌ڵوه‌شاندنه‌وه‌ی حكومه‌ته‌كه‌ی سه‌رۆكی وڵاته‌كه‌ ده‌كه‌ن.  

هاوكات ده‌سه‌ڵاتدارانی توركیا تۆڕه‌كانی ئینته‌رنێتیان بڕییه‌وه‌و له‌ زۆربه‌ی شاره‌كانیشدا بڕیاری قه‌ده‌غه‌ی هاتوچۆ ده‌ركراوه‌.

هه‌ر به‌پێی سه‌رچاوه‌كانی هه‌واڵ، دوێنی خۆپیشانده‌ران ویستوویانه‌ بچنه‌ نێو باره‌گای سه‌ره‌كی پارتی دادو گه‌شه‌پێدان(ئاكه‌په‌) له‌ ئیزمیر، به‌ڵام له‌لایه‌ن پۆیسه‌وه‌ رێگریان لێكراوه‌.

ئه‌مه‌ له‌كاتێكدا سه‌دان خۆپیشانده‌ر له‌سه‌رجه‌م ئه‌و شارانه‌ له‌لایه‌ن هێزه‌ ئه‌منییه‌كانی توركیاوه‌ ده‌ستگیركراون و ژماره‌یكیش كوژراون و بریندار بوون.

 لە وتارێكشیدا كه‌ بەبۆنەی نەورۆزەوە لە ئیستانبوڵ پێشكه‌شیكرد، رەجەب تەیب ئەردۆغان سەرۆكی توركیا ؛ رایگه‌یاند:" رێگە بەوانە نادەن كە سیستەمی مافیاگەرییان لە شارەوانی ئیستانبوڵ دروستكردووە، باری گشتیی تێكبدەن و شەقام بوروژێنن."

سه‌رۆكی توركیا وتی:" ئه‌و رێگایەی سەرۆکی (جەهەپە) داوایکرد، بنبەستە؛ نابەرپرسیارێتییەکی گەورەیە خەڵک لەسەر شەقامەکان بانگ بکەیت بۆ بەرگریکردن لە دزیی، توركیا راده‌ستی تیرۆری سەرشەقام نابێت، بەهۆی سكاڵایەكی یاساییەوە سەبارەت بە گەندەڵیی، دەیانەوێت ئاژاوە لە شەقامەكاندا دروستبكەن."

وتیشی:"بە ئاژاوەگێڕەكان دەڵێین رێگە بە دزەكان نادەین ئاژاوە بنێنەوە." 

بابەتی لێکچو

Copyright © 2020 Kirkuk Tv All Rights Reserved Designed And Developed By AVESTA GROUP