توێژینەوەیەک: خوشک ئاسوودەیی بە دەروون دەبەخشێت

توێژینەوەیەک لە ئێرلەندا دەریخستووە، ئەو کەسانەی لەگەڵ خوشکدا گەورە بوون، ئەگەری زیاترە دڵخۆشتر بن و دیدێکی ئەرێنییان بۆ ژیان هەبێت. بەپێی توێژینەوەکە، خوشکەکان هانی کرانەوەی زیاتر و دەربڕینی هەستەکان دەدەن لەنێو خێزاندا.
توێژینەوەکە لەلایەن زانکۆی دی مۆنت فۆرت و زانکۆی ئۆلستەر لە باکووری ئێرلەندا ئەنجامدراوە و تێیدا پرسیاری دەروونی لە 570 کەسی تەمەن 17 بۆ 25 ساڵ کراوە. ئەنجامەکان دەریانخستووە: ئەو بەشداربووانەی خوشکیان هەبووە، زیاتر ئامادەبوون باسی هەستەکانیان بکەن، کە ئەمەش وایکردووە دیدێکی ئەرێنییان بۆ ژیان هەبێت.
پڕۆفیسۆر تۆنی کاسیدی، سەرپەرشتیاری توێژینەوەکە، دەڵێت: "خوشکەکان هانی گفتوگۆی کراوە و یەکگرتوویی زیاتر دەدەن لە خێزانەکاندا. بەڵام براکان کاریگەرییەکی پێچەوانەیان هەیە."
کاسیدی روونی دەکاتەوە "کوڕان بە شێوەیەکی سرووشتی مەیلیان بۆ ئەوە نییە باسی شتەکان بکەن و کاتێک پێکەوەن، بێدەنگی هەڵدەبژێرن، بەڵام کچان ئەو بێدەنگییە دەشکێنن."
توێژینەوەکە ئەوەش باس دەکات، ئەو کچانەی خوشکیان هەیە، زیاتر سەربەخۆن و ئامانجی دیاریکراویان هەیە، ئەمەش بەو مانایەیە کە خوشکەکان نەک هەر پشتگیریی یەکدی دەکەن، بەڵکو دەبنە ئیلهامبەخشیش بۆ یەکدی.