نەتانیاهوو بەهۆی ژەهراویبوونەوە باری تەندروستیی تێکچوو

نووسینگەی بنیامین نەتانیاهوو، ئاشکرایکرد، سەرۆکوەزیرانی ئیسرائیل بەهۆی ژەهیراویبوونی بە خۆراک، باری تەندروستیی تێکچووە و نەیتوانیوە بەشداریی کۆبوونەوەی کابینەی حکومەتەکەشی بکات.
بەگوێرەی راگەیەندراوی نووسینگەی سەرۆکوەزیرانی ئیسرائیل، نەتانیاهوو شەوی رابردوو باری تەندروستیی تێکچووە، لە ئێستادا چارەسەری پزیشکی وەرگرتووە و تەندروستیی باشترە.
نووسینگەکەی دەشڵێت، نەتانیاهوو تاوەکو سێ رۆژی دیکە لە ماڵەوە دەمێنێتەوە و بە ڕێگەی ئۆنلاین بەشداری لە کۆبوونەوەکانی دەکات.
نەتانیاهوو تەمەنی  75 ساڵە و بەدەست کۆمەڵێک گرفتی تەندروستییەوە دەناڵێت، لە مانگی کانوونی یەکەمی ساڵی رابردوو نەشتەرگەریی پرۆستاتی بۆکرا و پێشتریش لە مانگی ئازاردا نەشتەرگەریی ریخۆڵەی بۆکراوە و لە هەمان مانگدا بەهۆی توشبوونی بە پەتا، چەندین رۆژ نێردرایە ماڵەوە.
ئەوە لەکاتێکدایە، پزیشکە تایبەتەکانی ئاماژەیان بۆ ئەوەکردووە، نەتانیاهوو ماوەی چەندین ساڵە کێشەی دڵیشی هەیە و بەهۆیەوە چەند جارێک چارەسەری پێدراوە.