وەزارەتی تەندروستیی غەززە: ژمارەی کوژراوانی غەززە 60 هەزار کەسی تێپەڕاند

بەگوێرەی دوایین راپۆرتی وەزارەتی تەندروستیی غەززە سەبارەت بە ژمارەی قوربانییەکانی کەرتەکە، ژمارەی گیانلەدەستدان بەهۆی بۆردومانەکانی ئیسرائیل بۆسەر کەرتەکە، گەیشتووەتە 60 هەزار و 34 کەس، هەروەها 145 هەزار و 870 کەسی دیکەش برینداربوون، هێشتاش ژمارەیەک لە قوربانییەکان لەژێر داروپەردووی باڵەخانە رووخاوەکان ماونەتەوە و بەرگریی شارستانی ناتوانێت دەریان بهێنێت.
دەشڵێ، لەسەدا 47 کوژراوەکانی کەرتی غەززە ژن و منداڵن، لە سەرەتای جەنگەکەوە، 18 هەزار و 592 منداڵ و نۆ هەزار و 782 ژن گیانیانلەدەستداوە.
تەندروستیی غەززە دەڵێ، ئەوەش ئاماژەیەکی روونە بۆ ئەو راستییەی ئیسرائیل راستەوخۆ خەڵی مەدەنی دەکاتە ئامانج.
لە راگەیەندراوەکەدا هاتووە، لە دوای پێشێلکردنی ئاگربەستی 18ـی ئازاری ئەمساڵ و دەستپێکردنەوەی بۆردومانەکانی ئیسرائیل، هەشت هەزار و 867 کەس گیانیان لەدەستداوە.