وەزارەتی بەرگری عیراق: سنورەکانمان بە تەواوی پارێزراون

لە ڕاگەیەندراوێكدا وەزارەتی بەرگری عیراق بڵاویكردەوە: هێزە ئەمنییەکان بە هەمو پێکهاتەکانیانەوە، هەوڵێکی زۆر دەدەن بۆ ئەوەی سنورەکانمان بە تەواوی پارێزراو بن و قەڵغانی گەورە بە درێژایی سنور دانراون، لەگەڵ زنجیرەیەک ڕێوشوێنی هونەری و تەکنیکی بۆ چاودێریکردن.
ئاماژەی بەوەشكرد: وەزارەتی بەرگری چاودێری ئەو بانگەشە پوچەڵ و مەبەستدارانەی کردوە کە سەبارەت بە ڕودانی کردەوەی دزەکردن یان قاچاغچێتی لە سنورەکانی عیراق لەگەڵ وڵاتانی دراوسێ بڵاوکراونەتەوە. بۆیە سنورەکانی عیراق، لە قەزای ڕەبیعەوە لە باکور تا سنوری عیراق-سوریا-ئەردەن لە باشور، بە توندی کۆنترۆڵکراون.
جەختیکردەوە: دەروازە سنورییەکان لەژێر چاودێری تەواوی لایەنە حکومییە پەیوەندیدارەکاندان و  لەلایەن دەزگاکانی دەوڵەت بە هەمو جۆرەکانیانەوە بەڕێوەدەبرێن و  بەپێی ڕێوشوێنی ورد و بەدواداچونی بەردەوام.
ئاشکراشیکرد: دەرچونی بەردەوام لەلایەن فەرماندە ئەمنییەکان و  میدیاییەکانەوە ئەنجام دەدرێت، لەوانە دەرچونێكی چەند ڕۆژێک لەمەوبەر لە دەروازەی سنوری قائیم.