هەردوو دادگەهـ ل هەمبەر دادگەها پلاسخارت

دهاتە پێشبینیكرن پشتی پێكئینانا كابینا نووی یا حكومەتا عیراقێ كێشە و گرفتێن هەلاویستیێن دناڤبەرا بەغدا و هەولێردا بهێنە چارەسەركرن، نەخاسم دەربارێ‌ پرسێن دارایی و دابینكرنا موچە و بودجێ هەرێما كوردستانێ، بەلێ‌ وەسا دەرنەچوو، بەروڤاژی وێ چەندێ دادگەها فیدراڵی چەكوچێ خۆ داوەشاندە سەرێ وان رێككەفتن و دهەڤگەهشتنێن زێدەتر ب شێوەیەكێ تیوری دناڤبەرا هەردوو دەستهەڵاتاندا هاتینە گەڵاڵەكرن، نەك مۆركرن.
ل سەر گۆڕەپانا هەرێما كوردستانێ ژی ناكوكی و لێكترازان یا بەردەوامە، پشتی دەمەكێ درێژ یێ دابڕان و هەڤڕكیێ، بۆ ئێكەم جار ل 28ـ1ـ2023 مەكتەبێن سیاسیێن ئێكەتی نیشتمانی كوردستان و پارتی دیموكراتی كوردستان كۆمبوونەك ل سلێمانیێ سازكر، كو پێشبینی دهاتەكرن ببیتە ئەگەرێ‌ بوهژاندنا پەیوەندیێن بەستیگرتیێن هەردوو حزبێن سەرەكی و دەرگەهەكێ خێرێ بۆ خەلكی ڤەببیت، بەلێ‌ دیسان دادگەها ئاسایشا هەولێر چەكوچێ خۆ لسەرێ‌ وێ دەستپێشخەریێ دا و جارەكا دی حەز و ئومێدێن خەلكی ڤەگەڕاندنە دلیس و كاڤلوژانكێ واندا.
هەتا ڕادەكێ زۆر بڕیارێن هەردوو دادگەها بوونە ئەگەر جینین پلاسخارت نوونەرا تایبەتا نەتەوێن ئێكگرتی ل عیراقێ ڕاپۆرتەكا نەرێنی دەربارێ‌ هەرێما كوردستانێ بتایبەتی بدەتە كۆمبوونا جڤاتا ئاسایشا نێڤدەولەتی ئەوا ل ڕۆژا پێنجشەمبی رێكەفتی 2 ـ 2 ـ 2023 هاتییە سازكرن كو زەنگەكا مەترسیێ یە بۆ هەرێمێ.
دڕاپۆرتا خۆدا پلاسخارت زێدەتر ئاماژێن نەرێنی ئاراستەی حكومەتا هەرێمێ كرن و بڤی شێوەی.
* هەر پرسەكا گرێدای پێشڤەچوونێ بەحس كربیت، هەرێم و دەستهەڵاتا وێ ژێ دڤەدەر بوون.
*  بەروڤاژی وێ چەندێ هەر ئاماژەكا خراب بەحس كربا، دەستهەڵاتا كوردی ژی بخۆڤە دگرت.
* پلاسخارت د ڕاپۆرتا خۆدا خۆیاكر كو حكومەتا بەغدا یا پێگیرە ب ڕێككەفتنێن خۆ دگەل هەرێمێ، بەلێ‌ دیار نەكر كا ل بەرامبەر وێ چەندێ هەرێم ژی پێگیریێ دكەت یان نە..!
* پلاسخارت بەحسێ بڕیارا دادگەها فیدراڵی ل دژی هەرێمێ ب خرابی بەحس نەكر.
* دەربارێ‌ رەوشا هەرێمێ پلاسخارت ب ئاشكرا گوت رەوشەكا خراب و بێسەروبەرە.
دماوێ كێمتر ژ دوو ساڵاندا ئەڤە دووەم زەنگا مەترسیێ یە جینین پلاسخارت بۆ هەرێما كوردستانێ لێددەت، ئێكەم جار ل 19 ـ 5 ـ 2021 دكۆنگرێ‌ ئێكڕێزی و دەستوردا ئەوێ ل زانكۆیا كوردستان ل هەولێر هاتییە رێكخستن پلاسخارت دپەیڤەكێدا ب ڕاشكاوی پەیامەك ئاراستەی دەستهەڵاتدارێن هەرێمێ كر و گوت: ئەگەر چاكسازی نەهێنە كرن د وێ هزرێدا نەبن هەتا هەتایی ئەڤ قەوارێ‌ حوكمرانیێ (هەرێما كوردستانێ) بڤی شێوەی بمینیت..!
پێدڤییە بهێتە زانین جڤاتا تەناهییا نێڤدەلوتی بلندترین گوپیتكا برێڤەبرنا سیاسەتا جیهانێ یە، رەخنێن پلاسخارت ژی كو ئاراستەی هەرێما كوردستانێ و دەستهەڵات و لایەنێن وێ یێن سیاسی كرین، نە گەفن و نە بوو ترساندنێ نە، بەلكو راستییە و بدوور ناهێتە زانین بۆ ئایندەكێ نێزیك نەخشێ سیاسیێ عیراقێ لسەر بهێتە دارشتن و ئەنجام ژی دێ د وێرانكار بن.
بەلێ‌ ل گورەی دیتن و پێشهاتان ژلایەكی ڤە كێشە و گرفتێن هەرێمێ و عیراقێ زێدەتر یێ ئاڵۆز دبن، ئەگەر چارەسەریێن بنەرەتی بۆ وان كێشە و گرفتان نەهێنە دیتن، چارەسەریێن بەروەخت گەلەك نا ڤەكێشن و وەكو یاریا زار و ماری بارودوخ دێ ڤەگەڕیتە چوارگۆشا ئێكێ.
 ژلایەكێ دیڤە ناكوكیێن حزب و لایەنێن سیاسیێن كوردستانی بەردەوام زێدە دبن، ئەگەر ب زووترین دەم پێنگاڤێن پراكتیكی نە هێنە هاڤێتن بەرەڤ ئاڤاكرنا سیستەمەكێ مۆدێرن و هەڤچەرخێ حوكمرانیێ بدوور ناهێتە زانین هەرێم رووی ب رووی روودانێن نەخوازراو ببیت.
 ئومێدەوارین وەكو كورد ئەم پێداچوونەكا هەمەلایەن د رەوشا خۆدا بكەین و هەوڵ بدەین ئاڤێ ڤەگەڕینینە دەراڤێن وێ.