کۆنگرەی بنیاتنانەوە

کۆنگرەی بنیاتنانەوە

رێبوار ستار

بۆ یەکەمجارە لە مێژووی یەکێتیی نیشتمانیی کوردستاندا کۆنگرە لە کات و ساتی خۆیدا ببەسترێت کە یەکێتی بە گرنگی زانی پێنجەمین کۆنگرەی خۆی تێدا ببەستێت کە دۆخی کوردستان وادەخوازێت و ئەم  هەنگاوش بۆتە جێی دڵخۆشیی تەواوی کادران  و ئەندامانی ی.ن.ک لەلایەک و لەلایەکی دیکەشەوە یەکێتی ئەوە دسەلمێنێت بۆ دۆست و نەیارەکانی کە یەکێتی ئێستا خاوەنی ئیرادەیەکی بەهێزتر و یەکڕیز و یەک ئاراستەیە و بە رێڕەوە راستەقینەکەی خۆیدا دەڕوات کە شوێن پێ و رێبازەکەی سەرۆک مام جەلالە، بۆیە دەکرێت ئەم کۆنگرەیە ناوبنرێت کۆنگرەی پێویست و بنیاتنانەوە . 
وەک کادران و ئەندامانی ئەو حزبە ئومێد دەکەین یەکێتی لەم کۆنگرەیەدا جگەلەوەی کە سەرکردایەتییەکی نوێ هەڵبژێرێت، خوازیاریشین  ڕێڕەو و ستراتیژ و بەرنامە و پەیڕەوێکی نوێی شارستانیانە پەسەند بکات کە لەگەڵ هەلومەرجی ئێستای کوردستان و عیراق و ناوچەوکە و جیهانیشدا بگونجێت . 
هەروەها  شێوازی کارکردنی ئۆرگانەکانی رێکخستن و میدیا و ئابووریی و سەربازی و هەڵبژاردن و هەموو جومگەکانی حزب بە شێوازێکی مۆدێرنانە رێکبخاتەوە و بیگونجێنێ  لەگەڵ دۆخی ئەمرۆدا.
  هەروەک هەنگاوی جدیش بنێت بۆئەوەی بەرنامەی تۆکمەی هەبێت بۆحوکمڕانی لە کوردستاندا، تا باشترین خزمەت بە کۆمەڵانی خەڵک بکات لە رێگەی نوێنەرەکانییەوە لە حکومەت و ئەو بەرنامەیەی هەیەتی بۆ حوکمڕانی لە هەرێمی کوردستان .
ئومێدیشمانە لەم کۆنگرەیەدا یەکێتی ئەوەی لای گرنگ دەبێت رۆڵی ژن وگەنج کە دووتوێژی گرنگی کۆمەڵگەن، فەرامۆش نەکرێن . 
هەروەها سوود لە توانای بە ئەزموونەکان وەربگرێت و گەڕانەوە بۆ خانووە قوڕەکانیش یەکتک بێت لە کارەکانی کۆنگرە و  داکۆکیکردن و بەرگری سەرسەختانە لە ناوچە جێناکۆکەکان و مادەی ١٤٠ بکات لە کارنامەکەیدا .
لەبەرنامەی نوێیدا بەگشتی خزمەتکردنی کۆمەڵانی خەڵک بکاتە پێشینەی کارەکانی خۆی پێکەوە لە یەکێتی نوێدا ، بۆیە ئومێدی زۆرمانە ئەم کۆنگرەیە کۆنگرەی سەرلەنوێ بنیاتنانەوەی یەکێتیەکەمان بێت، تا یەکێتی بە بەهێزتر بێت، چونکە تا یەکیتی بەهێزبێت، ئاوەدانی و ئازادی زیاتر گەشەدەکەن و ئارامی و سەقامگیریی زیاتر دێتە کایەوە و ژیانی خەڵک باشتر دەبێت و خۆشگوزەرانی بۆ خەڵک مسۆگەر دەبێت و ژیانی هەموو توێژەکان ئاسوودە دەبێت.