ته‌ندروستی عیراق هۆشداری له‌بڵاوبونه‌وه‌ی شه‌پۆلێكی نوێی كۆرۆنا ده‌دات

وه‌زاره‌تی ته‌ندروستی عێراق رایده‌گه‌یه‌نێت، به‌رزبونه‌وه‌ی حاڵه‌ته‌كانی توشبون به‌ كۆرۆنا له‌ چین و ده‌وڵه‌تانی كه‌نداو و  وڵاتانی دراوسێ، مه‌ترسی دوباره‌ سه‌رهه‌ڵدانه‌وه‌ی له‌عێراقدا زیادده‌كات. 

سه‌یف به‌در، وته‌بێژی وه‌زاره‌تی ته‌ندروستی عێراق رایگه‌یاند،" كێشه‌ی په‌تای كۆرۆنا هه‌ر به‌رده‌وامه‌و هه‌یه‌، هه‌میشه‌ هۆشداریمانداوه‌ له‌ ئه‌گه‌ری ده‌ركه‌وتنه‌وه‌ی گۆڕاوی نوێی ڤایرۆسه‌كه‌ و  جه‌ختمان له‌ به‌كارهێنانی ماسك و رێگه‌ خۆپارێزییه‌كانی دیكه‌ كردوه‌ته‌وه‌.

ئاماژه‌ی به‌وه‌شكردوه‌،"له‌ئێستادا له‌گه‌ڵ به‌رزبونه‌وه‌ی حاڵه‌ته‌كانی توشبون له‌ چین و وڵاتانی كه‌نداو و ده‌وڵه‌تانی دراوسێ، رۆژانه‌ به‌هه‌ماهه‌نگی له‌گه‌ڵ رێكخراوی ته‌ندروستی جیهانی سه‌رنجی ئاماره‌كانی توشبون ده‌ده‌ین، ره‌نگه‌ به‌رزبونه‌وه‌یه‌ك له‌ ژماره‌ی توشبواندا دروست بێت وه‌ك ئه‌وه‌ی ئێستا له‌و ده‌وڵه‌تانه‌ ده‌گوزه‌رێت.

وته‌بێژی وه‌زاره‌تی ته‌ندروستی عێراق ئاشكراشیكردوه‌: هه‌مو ئاماژه‌كان به‌و ئاڕاسته‌یه‌ن كه‌ تائێستا ڤایرۆسی كۆرۆنا كۆتایی نه‌هاتوه‌و  داواش له‌ هه‌موان ده‌كه‌ین ڤاكسین به‌كاربهێنن.