چوارچێوەی هەماهەنگی: ٢٠ی تەمموز دوا وادەیە بۆ سوننەکان سەرۆکی پەرلەمان دیاریی بکەن

چوارچێوەی هەماهەنگی شیعەکان لە پەرلەمانی عیراق، 20ـی تەمووز وەکو دوایین وادە بۆ سەرکردەکانی سوننە دیاری دەکات، تاوەکو پۆستی سەرۆکی ئەنجوومەنی نوێنەران یەکلایی بکەنەوە.
دوای کۆتایهاتنی مەراسیمی عاشورا، ئەنجوومەنی نوێنەرانی عێراق، وەرزی نوێی یاسادانان دەستپێدەکاتەوە و پرسی یەکلاکردنەوەی پۆستی سەرۆکی ئەنجوومەنەکەش، یەکێک دەبێت لە ئەجێندای سەرەکی دانیشتنەکان.
زیا هندی، ئەندامی ئەنجوومەنی نوێنەران رەتیکردەوە، موحسین مەندەلاوی نیازی گۆڕانکاریی لە پەیڕەوی ناوخۆی ئەنجوومەنی نوێنەراندا هەبێت، لە پێناو کردنەوەی دەرگا بۆ کەسایەتیی دیکە تاوەکو خۆیان بۆ پۆستی سەرۆکی ئەنجوومەنی نوێنەران کاندید بکەن.
بە وتەی ئەو پەرلەمانتارە، لەناو سوننەکاندا نیمچە رێککەوتن لەسەر دیاری کردنی سالم عیساوی هەیە، هەندێک هێزی گەورەی شیعەش کە دژی عیساوی بوون هەڵوێستی خۆیان گۆڕیوە، ئەوەش نزیکبوونەوەی دید و بۆچوونەکانی لێکەوتووەتەوە.