فەهمی بورهان: لە پێكنەهێنانی حكومەتی خۆجێی كەركوك كورد زەرەرمەندی یەكەمە

سەرۆكی دەستەی ناوچە كوردستانییەكان رایدەگەیەنێت، لە پێكنەهێنانی حكومەتی خۆجێی كەركوك كورد زەرەرمەندی یەكەمە.
فەهمی بورهان، سەرۆكی دەستەی ناوچە كوردستانییەكان لە لێدوانێكدا رایگەیاند، لە پێكنەهێنانی حكومەتی خۆجێی كەركوك، كورد زەرەرمەندی یەكەمە و دواتر پێكهاتەی توركمان دێت.
هەروەک جەختیکردەوە کە مافی ئەو هاوڵاتییانەیە کە دەنگیانداوە، حكومەتی خۆجێی بۆ شارەكەیان پێكبهێندرێت .
وتیشی، “پێكنەهێنانی ئیدارەی نوێی کەرکوک وادەكات چاودێریی بەسەر كاری فەرمانگەكانەوە نەبێت و مامەڵەی هاوڵاتییان وەك پێویست رایی نەكرێت”.
زیاتر لە ٧ مانگە هەڵبژاردنی ئەنجومەنی پارێزگاکانی کەرکوک ئەنجامدراوە و بەهۆی ناکۆکی لایەنەکانیش لەکەرکوک، پێکهێنانی ئیدارەی پارێزگاکە دیارنییە .
لە ساڵی ٢٠٠٥وە، یەکەمین جارە هەڵبژاردنی ئەنجومەنی پارێزگای کەرکوک بەرێوەبچێت، کەچی هەندێک لایەن بە عەقڵییەتی شۆفێنی دەیانەوێت، مافی کورد پێشێل بکەن، چونکە پۆستی پارێزگاری کەرکوک پشکی کوردە و لەناو کوردیش ئیسحقاقی یەکێتی نیشتمانی کوردستانە.