مووچەی خانەنشینیی هێزەکانی 70 و 80 دەخرێتە سەر وەزارەتی دارایی

فەتحوڵا عومەر جێگری بەڕێوەبەری خانەنشینیی هێزەکانی 70 رایگەیاند: حەوت هەزار و 508 خانەنشینی هێزەکانی 70 مووچەکانیان گوازراوەتەوە سەر خانەنشینی وەزارەتی پێشمەرگە و بەپێی یاسای چاکسازی پێویستە سەرجەم خانەنشینانی هێزەکانی 70 و 80 مووچەکانیان بگوازرێتەوە سەر خانەنشینی وەزارەتی پێشمەرگە و پاشان بخرێنە سەر بەڕێوەبەرایەتی گشتی خانەنشینی کە سەر بە وەزارەتی دارایی حکومەتی هەرێمى کوردستانە".

وتیشی: بەهۆی نەبوونی دەستەی خانەنشینی لە هەرێم، پێشتر خانەنشینانی هێزەکانی 70 لەسەر هێزەکە دەمانەوە، بەڵام لەئێستادا بەهۆی جێبەجێکردنی یاسای چاکسازی پێویستە دەستەی خانەنشینی هەرێم پێکبهێندرێت و سەرجەم خانەنشینی هێزەکان بخرێنە سەر ئەو دەستەیە، بەڵام تا دەستەکە پێکدەهێنرێت خانەنشینانی هێز و یەکەکان دەخرێنە سەر بەڕێوەبەرایەتی گشتی خانەنشینی هەرێم کە سەر بە وەزارەتی داراییە.

پێشتر بەشێک لە خانەنشینانی هێزەکانی 70 و 80 کێشە بۆ پێدانی مووچەکانیان دروست بوو، بە هۆیەوە دوو مانگ مووچەکانیان دواکەوت .