بازرگانیی عیراق: چیتر ئاردی سفر هاوردە ناکەین و لەناوخۆ بەرهەمی دەهێنین

وەزارەتی بازرگانیی عێراق گرێبەستی لەگەڵ پێنج کارگەی گەورە کردووە بۆ دابینکردنی ئاردی سفر و بە هۆیەوە 750 ملیۆن دۆلاری ساڵانە بۆ حکومەت دەگەڕێتەوە.
لەوبارەیەوە محەمەد حەنون، وتەبێژی وەزارەتی بازرگانی بە ئاژانسی هەواڵی عێراقی راگەیاندووە، وەزارەتی بازرگانی گرێبەستی لەگەڵ پێنج کارگەی گەورە کردووە کە بەشدارن لە پاڵپشتیکردنی بەرهەمی ناوخۆیی و ئاردی سفر، بۆ بەشەخۆراکی مانگانەی هاوڵاتییان.
راشیگەیاند، عێراق ساڵانە بڕی 750 ملیۆن دۆلاری لەدەستدەدا بۆ کڕینی ئارد لە وڵاتانی دراوسێوە، بەڵام بە پشتبەستن بە کارگە ناوخۆییەکان، هێزی مرۆیی و ئەم بڕە دراوە پاشەکەوت دەبێت و پاڵپشتیی بەرهەمی نیشتمانیش دەکات".
ئەوەشی روونکردەوە، وەزارەتی بازرگانی خاوەنی 196 کارگەی تایبەتە کە بەدرێژایی ساڵانی پێشوو بەشدارییان لە ئامادەکردنی بەشەخۆراکی مانگانەی هاوڵاتییاندا کردووە.
ئەمە لەکاتێکدایە، حکومەتی عێراق باجی لەسەر هاوردەکردنی ئاردی سفر زیاد کردووە بۆ 30% تاوەکو بەرهەمی ناوخۆیی کێبڕکێی بەرهەمی ئاردی سفری تورکی و ئێرانی بکات.