بەپێی راگەیەنراوێکی وەزارەتی تەندروستیی عێراق, وەزارەتەکەیان لەگەڵ رێکخراوی تەندروستیی جیهانی لەبارەی پلانی رێگریکردن لە ئاوڵەی مەیموون لە عێراق کۆبوونەوە.
لە راگەیەنراوەکەدا هاتووە "لە کۆبوونەوەکەدا رەوشی ئێستای پەتای ئاوڵەی مەیموون و راگەیاندنی باری لەناکاو بەهۆی پەتاکە لەلایەن تەندروستی جیهانی و رێگاکانی توووشبوون بە نەخۆشییەکە و چۆنێتیی دەستنیشانکردنی خراونەتە بەر باس".
وەزارەتی تەندروستیی عێراق دەڵێت: لە هەمان کۆبوونەوەدا پلانی وەزارەتەکە خراوەتەڕوو بۆ رێگاگرتن لە هاتنەناوەوەی نەخۆشییەکە بۆ عێراق، ئەویش بە دانانی رێوشوێنی پشکنینی پێویست لە فڕۆکەخانەکان و دەروازە سنوورییەکان.
هەردووڵا جەختیان لەسەر گرنگیی هەڵمەتی هۆشیارکردنەوە لەبارەی پەتای ئاوڵەی مەیموون بە هاوکاری دەزگاکانی راگەیاندن و هۆکارەکانی دیکە کردووەتەوە.
لە راگەیەنراوەکەدا دووپاتکراوەتەوە کە تاوەکو ئێستا لە عێراق هیچ حاڵەتێکی ئاوڵەی مەیموون تۆمارنەکراوە.
Copyright © 2020 Kirkuk Tv All Rights Reserved Designed And Developed By AVESTA GROUP