دوو سکاڵا بۆ هەڵوەشاندنەوەی پەرلەمانی کوردستان لە دادگای فیدراڵی تۆمارکراون

دادگای فیدراڵی عێراق رۆژی شەشی تەمموزی داهاتووی بۆ دادبینیی دوو سکاڵای تایبەت بە هەڵوەشاندنەوەی پەرلەمانی کوردستان دیاریکرد، لە سکاڵاکاندا داوای هەڵوەشاندننەوەی پەرلەمانی کوردستان و گەڕانەوەی ئەو ئیمتیازات و شایستە داراییانە کراوە، کە بەخشراوەتە 97 پەرلەمانتار.
سکاڵای یەکەم، عومەر گوڵپی، ئەندامی پێشووی پەرلەمانی کوردستان، لەسەر سەرۆکی هەرێمی کوردستان و سەرۆکی کاتیی پەرلەمانی کوردستان تۆماریکردووە، سکاڵاکار داوادەکات، بەهۆی پابەندنەبوون بە پەیڕەوی ناوخۆی پەرلەمان لەلایەن سەرۆکی کاتیی پەرلەمانەوە بۆ هەڵبژاردنی دەستەی سەرۆکایەتیی پەرلەمان، دانیشتنی یەکەم بە نایاسایی بناسێنێت و خولی شەشەمی پەرلەمانی کوردستان هەڵبوەشێنێتەوە.
لە سکاڵاکەدا داواشکراوە، هەموو ئیمتیازاتەکان لە 97 پەرلەمانتار وەربگیرێتەوە و کۆمیسیۆن رابسپێردرێت بۆ ئامادەکاریی هەڵبژاردنی پەرلەمانی کوردستان.
سکاڵای دووەم لەلایەن سروە عەبدولواحید و کاوە عەبدولقادر، ئەندامانی ئەنجوومەنی نوێنەرانی عێراق و کوردەوان جەمال ئەندامی پەرلەمانی کوردستان لە فراکسیۆنی نەوەی نوێ لەسەر سەرۆکی هەرێمی کوردستان تۆمارکراوە، سکاڵاکاران دەڵێن، سەرۆکی هەرێمی کوردستان نەیتوانیوە دەسەڵاتەکانی بەکاربهێنێت و پەرلەمانی کوردستان هەڵبوەشێنێتەوە.