سوپای ئیسرائیل: لەعیراقەوە هێرشی ئاسمانی کراوەتە سەرمان

سوپای ئیسرائیل رایگەیاند، لە عێراقەوە هێرشێکی درۆنی کراوەتە سەر ناوچەی بیسان کە دەکەوێتە باکووری کەناری رۆژئاوای ئیسرائیل و گروپی فەسائیلی عێراقیش دەڵێت، ئەوان هێرشەکەیان کردووە.
سوپای ئیسرائیل لە راگەیەندراوێکدا دەڵێت، شەوی یەکشەممە، چەندین مووشەکی رێگریکەریان ئاراستەی درۆنێک کردووە کە لە ئاسمانی عێراقەوە ئاڕاستەی وڵاتەکەیان کرابوو.
بەگوێرەی زانیارییەکانی سوپای ئیسرائیل، درۆنەکەی عێراق بەسەر ئاسمانی سووریادا فڕیوە، پێش ئەوەی بگاتە ئیسرائیل.
لای خۆشییەوە، گروپی فەسائیلی عێراق هێرشەکەی بۆسەر ئیسرائیل لەئەستۆگرت و رایگەیاند، رۆژی یەکشەممە بە مووشەکی کروز و درۆنی هێرشبەر، هێرشێکیان بۆ سەر ئیسرائیل دەستپێکردووە، ئەمەش لە چوارچێوەی "قۆناغێکی نوێ لە بەرەی پشتیوانیی" لەگەڵ لوبنان.