بایدن داوا دەکات ئاگربەست لە لوبنان رابگەیەندرێت

جۆ بایدن، سەرۆکی ئەمریکا پاش هێرش و بۆردوومانە چڕەکانی دوێنێی سوپای ئیسرائیل بۆ سەر لوبنان داوایکرد ئاگربەست لە لوبنان رابگەیەندرێت، هاوکات سەعد حەریری، سەرۆکوەزیرانی پێشووی لوبنان، داوای لە لوبنانییەکان دەکات ناکۆکییەکان وەلابنێن.
جۆ بایدن، سەرۆکى ئەمریکا لە وەڵامی پرسیاری رۆژنامەنووساندا، دەربارەی ئەگەری ئەنجامدانی هیرشی زەمینی ئیسرائیل بۆ سەر لوبنان، رایگەیاند، ئێستا کاتی ئاگربەستە.
هاوکات وەزارەتی تەندروستیی لوبنان، ئاماری قوربانییانی رۆژی شەممەی بۆردوومانەکانی سوپای ئیسرائیلى بۆ سەر لوبنان خستەڕوو و رایگەیاند، بەهۆى ئەو هێرشانەوە 33 کەس کوژراون و 195ـی دیکەش برینداربوون.

لە لایەکی دیکەشەوە، سەعد حەریری، سەرۆکوەزیرانی پێشووی لوبنان، لە کاردانەوەی کوژرانی حەسەن نەسروڵا، ئەمینداری گشتی حیزبوڵا، داوای لە لوبنانییەکان کرد ناکۆکییەکان وەلابنێن، وتیشی؛ بە کوشتنی نەسروڵا لوبنان و ناوچەکە چوونەتە ناو قۆناغێکی نوێی توندوتیژییەوە.