بەریتانیا گەشتێکی بازرگانی بۆ گەڕانەوەی هاوڵاتییەکانی لە لوبنان رێکخستووە

وەزارەتی درەوەی بەریتانیا رایگەیاند، گەشتێکی بازرگانی رێکخستووە بۆ ئەو هاوڵاتییانەی وڵاتەکەی کە دەیانەوێت لوبنان بەجێبهێڵن، ئەوەش دوای ئەوەی گەشتە ئاسمانییەکانی لەگەڵ بەیروت راگرت.
ئاماژەی بەوەکردووە، فڕۆکەکە رۆژی چوارشەممە لە فڕۆکەخانەی نێودەوڵەتیی رەفیق حەریری، لە بەیروتەوە بەڕێدەکەوێت.
دەیڤید لامی وەزیری دەرەوەی بەریتانیا رایگەیاند، سەلامەتی هاوڵاتییانی بەریتانیا لە لوبنان لە پێشینەی کارەکانمانە، لەبەر ئەم هۆکارەش حکومەتی بەریتانیا گەشتێکی رێکخستووە بۆ هاوکاریکردنی ئەو کەسانەی دەیانەوێت وڵاتەکە بەجێبهێڵن، رەنگە دواتر گەرەنتی گەڕانەوەیان نەکرێت".
بەریتانیا هەفتەی رابردوو رایگەیاند، 700 سەربازی لە قوبرس جێگیرکردووە، وەک ئامادەکارییەک بۆ بردنە دەرەوەی هاوڵاتییانی وڵاتەکەی لە لوبنان.
لەسەرەتای توندبوونی گرژییەکانی نێوان ئیسرائیل و لوبنانیشەوە، هێڵە ئاسمانییەکانی بەریتانیا گەشتی چوون و گەڕانەوەیان بۆ بەیروت راگرتووە.