سوپای ئیسرائیل ئاماری یەک ساڵەی جەنگی بڵاوکردەوە

سوپای ئیسرائیلیش ئاماری یەک ساڵەی جەنگی لەگەڵ حەماس و حیزبوڵا بڵاوکردەوە و رایگەیاند، لە ساڵی رابردووەوە 726 سەربازیان کوژراون و چوار هەزار و 576 سەربازی دیکەشیان برینداربوون.

راشیگەیاند، لە سەرەتای جەنگەکەوە 300 هەزار سەربازی یەدەگیان وەرگرتووە کە %82ـیان پیاون و %18 ژنن.

سوپای ئیسرائیل دەشڵێت، لە ماوەی ساڵێکدا زیاتر لە 800 چەکداریان لە لوبنان کوشتووە، زیاتر لە پێنج هەزار گومانلێکراویش لە کەناری خۆرئاوا و دۆڵی ئەردەن دەستگیرکراون.

ئەوەشی بڵاوکردووەتەوە، لە ماوەی ساڵی رابردوودا، هەشت فەرماندەی لیوا چەکدارەکانی کەرتی غەززە و نزیکەی 30 فەرماندەی کەتیبەکان و 165 فەرماندەی سریەیان کوشتووە.

ئاماژەی بەوەشکردووە، 13 هەزار و 200 مووشەک لە غەززەوە، 12 هەزار و 400 مووشەک لە لوبنانەوە، 60 مووشەک لە سوریاوە، 180 مووشەک لە یەمەن و 400 مووشەکیش لە ئێرانەوە ئاراستەی ئیسرائیل کراون.

دەشڵێت لە ماوەی ساڵی رابردوودا لە کەرتی غەززە، ئیسرائیل زیاتر لە 40 هەزار ئامانجی بۆردوومان کردووە و چوار هەزار و 700 تونێلی دۆزیوەتەوە و هەزار شوێنی مووشەکهاوێژیشی لەناوبردووە.