پزیشکیان : کۆماری ئیسلامی شەرخواز نییە

دوای ئەوەی ئیسرائیل ھێرشی تۆڵەکردنەوەی کردە سەر ئێران، چاوەڕوان دەکرا ململانێی ئەو دوو وڵاتە نەگاتە ئاستی وەڵامدانەوە، بەڵام ئێران جەختدەکاتەوە کە وەڵامی پێویستی ئیسرائیل دەداتەوە، تەلئەبیبیش دەڵێت ئێران ناتوانێت بەمزووانە کاردانەوەی ھەبێت. لەبارەی وڵامدانەوەی ئێرانەوە پزیشکیان لە نوێترین لێدوانیدا رایگەیاند: کۆماری ئیسلامی شەڕخواز نییە و خۆی لە جەنگ بەدور دەگرێت بەڵام تاران کاردانەوەی پێویستی بۆ ھێرشەکانی ئیسرائیل دەبێت.
بەپێی رۆژنامەی وۆڵستریت جۆرناڵی ئەمریکیش، بەھۆی ھێرشەکەی ئیسرائیلەوە لانیکەم چوار قەڵغانی دژە موشەکیی تێکشکاون کە تایبەتبوون بە پاراستنی ژمارەیەک پاڵاوگەی نەوت و بەرھەمی پترۆ کیمیایی و کێڵگەی غاز و بەندەرێکی سەرەکی لە باشوری ئێران.
رۆژنامەکە لەزاری لێپرسراوانی ئێرانەوە دەڵێت، تێکشکاندنی سیستمی بەرگری ئاسمانی نیگەرانییەکی قوڵی لە ئێران دروستکردووە و ترسیان ھەیە لە ئەگەری بەردەوامبوونی گرژی و ھێرشەکان، ناوە سەرەکییەکانی وزە و ئابوری بکرێنە ئامانج. ھاوکات کەناڵی 13ی ئیسرائیل بڵاویکردووەتەوە، ئەگەری زۆرە ئێران وەڵامی ھێرشەکان بداتەوە بەڵام بەھۆی ئەو زیانانەی بەریکەوتووە پێناچێت بەمزوانە بتوانێت ھێرشی پێچەوانە بکاتەوە.