دوو ڕاوێژکاری بایدن لە هەوڵدان بۆ کۆتاییهێنان بە شەڕی لوبنان

ماڵپەڕی ئاکسیۆس-ی ئەمریكی بە پشتبەستن بە سێ سەرچاوە کە ناویان نەهێنراوە بڵاویكردەوە، سبەی پێنجشەممە ئامۆس هۆكستاین و برێت مەکگۆرک ڕاوێژکارە باڵاکانی جۆو بایدن سەرۆكی ویلایەتە یەكگرتوەكات، دەگەنە ئیسرائیل بەمەبەستی هەوڵدان بۆ ئەنجامدانی ڕێککەوتنێک کە کۆتایی بە شەڕی لوبنان بهێنێت.

ئاماژەی بەوەشكردوە، ئێوارەی ئەمڕۆ بنیامین نەتەنیاهۆ سەرۆک وەزیرانی ئیسرائیل کۆبونەوەیەک ئەنجام دەدات بۆ تاوتوێکردنی هەوڵە دیپلۆماسییەکان بۆ کۆتاییهێنان بە شەڕی لوبنان.

هاوكات ئاژانسی ڕۆیتەرز لە زاری بەرپرسانی ئیسرائیل و ئەمریکاوە بڵاویكردوەتەوە، لەماوەی چەند هەفتەیەکدا ڕێککەوتنێک ئەنجامدەدرێت کە کۆتایی بە شەڕی نێوان ئیسرائیل و گروپی حزبوڵای لوبنان دەهێنێت.

لایخۆیەوە باراک ڕاڤید، پەیامنێری سیاسی ئەكسۆس لە هەژماری تایبەتی خۆی لە پلاتفۆرمی "X" بە پشتبەستن بە دو سەرچاوە بڵاویكردوەتەوە، نەتەنیاهۆ کۆبونەوەیەک لەگەڵ ژمارەیەک وەزیر و سەرۆکی دەزگا سەربازیەكان و هەواڵگرییەکان ئەنجام دەدات بۆ گفتوگۆکردن لەسەر کۆتاییهێنان بە شەڕی لوبنان.

لەلایەكی دیكەوە ڕۆژنامەی یەدیۆت ئەحرانۆت-ی ئیسرائیلی لە زاری سەرچاوە ڕۆژئاواییەکانەوە بڵاویكردوەتەوە، حزبوڵای لوبنان ڕەزامەندی دەربڕیوە لەسەر جیاکردنەوەی مەلەفی لوبنان لە غەززە.

ئاماژەی بەوەشکردووە، ئامۆس هۆكستاین نوێنەری ئەمریکا سەرکردایەتی ئەم هەوڵانە دەکات و بەنیازە سەردانی هەردو ئیسرائیل و لوبنان بکات، گفتوگۆکان بۆ گەیشتن بە ڕێککەوتن لە لوبنان کە قۆناغی باشی بڕیوە.