کەشناسی: شەپۆلێکی لێزمەباران و هەورەتریشقە دەستپێدەکات

کەشناسی هەرێمی کوردستان پێشبینی دەکات شەپۆلێکی لێزمەباران و هەورە تریشقە دەستپێبکات و سەرەتاش سلێمانی و هەڵەبجە و کەرکوک دەگرێتەوە.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ ، ئاسمان ساماڵ و پەڵەهەور دەبێت و شەو دەگۆڕێت بۆ نیمچە هەور، پلەی گەرماش کەمێک بەرزتر دەبێتەوە.
سەبارەت بە سبەینێ ڕایگەیاند: لە بەرەبەیانەوە شەپۆلێکی باران بارین لە سنووری پارێزگەی سلێمانی و هەڵەبجە و کەرکوکەوە دەستپێدەکات و پاشان کاریگەری درێژدەبێتەوە بۆ سەرجەم ناوچە جیاجیاکانی هەرێم.
ڕوونیشێکردەوە: بارانبارین بەشێوەی نمەباران و هەندێ کات ئەگەری لێزمەباران و هەورەتریشقە دەبێت لەگەڵ نزم بوونەوەی پلەکانی گەرما و کەمێک زیادبوونی خێرایی با.