وڵاتانی جیهان لەسەر فەرمانی دەستگیرکردنی سەرۆکوەزیرانی ئیسرائیل کاردانەوەی جیاوازیان هەیە

دوێنێ دادگەی نێودەوڵەتیی تاوان فەرمانی دەستگیرکردنی بۆ هەریەک لە بنیامین نەتەنیاهوو، سەرۆکوەزیرانی ئیسرائیل، یواڤ گاڵانت، وەزیری بەرگریی ئیسرائیل و محەممەد زێف، فەرماندەی سەربازیی حەماس دەرکرد و رایگەیاند نەتەنیاهوو و گالانت تۆمەتبارن بە تاوانی جەنگ و تاوانی دژی مرۆڤایەتی.
وڵاتانی جیهانیش لەسەر دەرکردنی ئەو فەرمانە کاردانەوەی جیاوازیان هەیە و ئیسرائیل و هاوپەیمانەکانی بە دڵیان نییە و رێکخراوەکانی پاراستنی مافی مرۆڤ دڵخۆشن.
لەکاردانەوەی فەرمانەکەدا نووسینگەی نەتەنیاهوو لە راگەیێندراوێکدا، دەڵێت ئەم بڕیارەی دادگا دژە سامییە، وتەبێژێکی ئەنجوومەنی ئاسایشی نیشتمانیی ئەمریکاش جەخت دەکاتەوە ئەمریکا بە هەموو شێوەیەک بڕیارەکە رەتدەکاتەوە.
دەشڵێت، ئێمە زۆر نیگەرانین لە پەلەکردنی دادوەرەکە لە دەرکردنی فەرمانی دەستگیرکردن و لەو هەڵانەی لە پڕۆسەکەدا کران و بوونە هۆی ئەم بڕیارە.
هەر لە کاردانەوەی فەرمانەکەدا بەسام نەعیم، ئەندامی مەکتەبی سیاسیی حەماس رایگەیاند ئەمە هەنگاوێکی گرنگە بەرەو دادپەروەری و دەکرێت قەرەبووکردنەوەی بۆ قوربانیان بە گشتی لێبکەوێتەوە، بەڵام ئەگەر بە هەموو شێوەیەک لە لایەن هەموو وڵاتانی سەرانسەری جیهانەوە پشتیوانیی لێ نەکرێت، بە بڕیارێکی سنووردار و هێمایی دەمێنێتەوە.
 هیومەن رایتس وۆچیش رایگەیاند، فەرمانەکانی دادگەی نێودەوڵەتیی تاوان بۆ دەستگیرکردنی سەرکردەکانی ئیسرائیل و بەرپرسێکی حەماس ئەو تێڕوانینەیان شکاند کە دەڵێت هەندێ کەس لە سەرووی یاساوەن.
دادگەی نێودەوڵەتیی تاوان 124 وڵات تێیدا ئەندامن و لە ئەگەری گەشتکردنی ئەو کەسانەی فەرمانی دەستگیرکردنیان بۆ دەرچووە، هەرکام لەو وڵاتە بەشدارانە، بڕیارەکە جێبەجێ دەکرێت و داواکراوەکە دەستگیر دەکرێت.