عیراق 1%ی مووچەی مووچەخۆران وەک هاوکاری بۆ غەززە و لوبنان دەنێرێت

بە بڕیاری ئەنجوومەنی وەزیرانی عێراق بڕی 1% لە مووچەی سەرجەم مووچەخۆران دەبڕدرێت و وەک هاوکاری بە لێقەوماوانی غەززە و لوبنان دەدرێت.
بەپێی نووسراوێکی ئەنجومەنی وەزیرانی عێراق لە رێکەوتی 19ی ئەم مانگە دەرچووە، لە سەرەتای ئەم مانگەوە وەزارەتی دارایی رێژەی 1% لە كۆی مووچەی فەرمانبەران و مووچەی خانەنشینی لە سەرجەم دامەزراوەكان دەبڕدرێت وەك بەخشینێكی ئارەزوومەندانە و دەخرێتە سەر هەژماری پشتیوانی (غەززە و لوبنان)، بەشێوەیەكی یەكسان یان بەپێی میكانیزمێک کە ئەنجوومەنی وەزیران دیاریدەكات.
هەر لە نووسراوەکەدا هاتووە، هەر مووچەخۆرێک خواستی ئەوەی نەبێت بەشداریی ئەم بەخشینە بكات، پێویستە داوایەك بۆ سەرۆكی دەزگاكەی بەرزبكاتەوە بۆ ئەوەی ناوی لە لیستی بەخشەران دەربهێنرێت و ئەو بڕە پارەیەی لێنەبڕدرێت.