تەندروستی جیهانی: غەززە دەرمان و خۆراکی تێدا نییە و لەژێر گوشاری سەختی زستاندایە

تێدرۆس ئەدهانۆم بەڕێوەبەری رێکخراوی تەندروستی جیهانی رایگەیاند: لە 90٪ـی دانیشتوانی کەرتی غەززە لەم وەرزی زستانەدا لە ژێر چادردا دەژین، لەهەمانکاتدا دانیشتوانەکەی بەدەست کەمی داودەرمان و خۆراک و سوتەمەنی و شوێنی حەوانەوە دەناڵێنن .
داواشی لە ئیسرائیل کرد، رێگە بە چونە ناوەوەی هاوکارییە مرۆییەکان بدات بۆ دانیشتوانی کەرتی غەززە .
ئاماژەی بەوەشکرد: کەمبونەوەی داودەرمان و نەبونی شوێنی حەوانەوە، دانیشتوانی کەرتی غەززەی روبەڕوی چەندین نەخۆشی کردۆتەوە و کەشی سارد و باراناوی و لافاویش ئاسایشی خۆراکی لەو ناوچەیە خستوەتە مەترسییەوە.
باسیلەوەشکرد: لەم هەفتەیەدا ڕێکخراوەکەیان ئاسانکاری بۆ گواستنەوەی 17 نەخۆش لە کەرتی غەززەوە بۆ ئوردن کردوە، کە بڕیارە 12 نەخۆش بچنە ئەمەریکا بۆ وەرگرتنی چارەسەر.