دوو بەرپرسی رۆژئاوای کوردستان بۆ مەراسیمی دەستبەکاربوونی سەرۆکی ئەمەریکا بانگهێشت کراون

فەرماندەی گشتی هێزەکانی سوریای دیموکرات و هاوسەرۆکی فەرمانگەی پەیوەندییەکانی دەرەوەی هەرێمی باکور و رۆژهەڵاتی سوریا بۆ مەراسیمی دەستبەکاربوونی سەرۆکی ئەمەریکا بانگهێشت کراون.
میدیاکانی ئەمەریکا بڵاویانکردوەتەوە، هەریەک لە مەزڵوم عەبدی، فەرماندەی گشتی هێزکانی سوریای دیموکرات و ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی هەرێمی باکور و رۆژهەڵاتی سوریا بۆ مەراسیمی دەستبەکاربونی دۆناڵد ترەمپ، سەرۆکی ئەمەریکا لە 20ی کانوونی دووەمی 2025 بانگهێشتکراون.
هاوکات، ئیلهام ئەحمەد لە چاوپێکەوتنێکدا لەگەل ماڵپەڕی ئەلمۆنیتۆر، سەبارەت بە بانگهێشتنامەکەی سەرۆکی ئەمەریکا رایگەیاند، پێدەچێت پێکەوە لەگەڵ مەزڵوم عەبدی سەردانی ئەمەریکا بکەن و لەگەڵ کابینە نوێکەی دۆناڵد ترەمپدا کۆببینەوە.
ئەمەش لە کاتێکدا دۆناڵد ترەمپ لە خوڵی یەکەمی سەرۆکایەتییەکەی بە تەلەفۆن لەگەڵ مەزڵوم عەبدی پەیوەندییەکی بەست و بە ژەنەڕال ناوی هێنا.