كۆمسیۆن پارەی پاداشتی کارمەندانی سندوقەکانی دەنگدانی ناردووه‌ هه‌رێم دابه‌شینه‌كردووه‌

حکومەتی عیَراق پارەی پاداشتی کارمەندەکانی سەر سندوقەکانی دەنگدانی بۆ خولی شەشەمی پەرلەمانی کوردستان ناردووە و رێکارەکانی تەواوکردووە، بەڵام وەزارەتی دارایی هەرێم دابەشی نەکردووە و زیاتر لە ٤٠ هەزار کارمەندیش کە سوودمەند دەبن لەو پاداشتە زیاتر لە مانگێکە چاوەرێن، وتەبێژی کۆمسیۆن- یش رایدەگەیەنێت:" ئەو پارەیەی کە بۆ کارمەندانی کۆمسیۆن دانراوە لە بەغدا هەموو رێکارێکی تەواو بووە و ئێستا ئەو بڕەپارەیە لەبەردەستی وەزارەتی دارایی هەرێم-دایە". 

زیاتر لە 42 هەزار فەرمانبەرو خویندکاری دەرچووی زانکۆ و پەیمانگەکان وەک کارمەندی کاتی سەر سندوقەکانی دەنگدانی تایبەت لە ١٨-١٠-٢٠٢٤ و دەنگدانی گشتی ٢٠-١٠-٢٠٢٤ی پەرلەمانی کوردستان کاریان کرد، کە بۆ هەر کارمەندێک بەپێی ئەرکەکەی بڕێک  پاداشتی بۆ خەرجدەکرێت.
جومانە غەلای وتەبێژی کۆمسیۆنی باڵای هەڵبژاردنەکانی عیراق بە وێبسایتی یەکێتیی نیشتمانی کوردستان PUKMEDIA ی راگەیاندووه‌:"ئەو پارەیەی کە بۆ کارمەندانی کۆمسیۆن دانراوە لە بەغدا هەموو رێکارێکی تەواو بووە و ئیستا گەیشتووەتە لای وەزارەتی دارایی هەرێم".
"زیاتر لە٤٠ هەزار کارمەند بەشدارییان لەبەڕێوەبردنی هەڵبژاردنی پەرلەمانی کوردستان کردووە، بەجۆرێک هەر کارمەندێکی حکومەت کە بەشداری لەبەڕێوەبردنی رۆژی دەنگدناندا کردبێت بڕی ئەو پارەیەی وەریدەگریت ١٥٠ هەزار دینارە، هاوکات دەرچووی زانکۆ و پەیمانگاکان ٢٥٠ هەزار و فەرمانبەری یەدەگ ٥٠ هەزار دینار وەردەگرێت"، جومانە غەلای وایوت.

تائێستا وەزارەتی دارایی هەرێم هیچ وادەیەکی بۆ خەرجکردنی ئەو پاداشتەی کارمەندانی سەر سندوقەکانی دەنگدان رانەگەیاندووە و PUKMEDIA  چەند جارێک پەیوەندی بە وتەبێژی وەزارەتی دارایی هەرێمی کوردستانەوە کرد، بەڵام وەڵامی نەدایەوە.
رۆژی ٢٠ـی ١٠ـی ٢٠٢٤ هەڵبژاردنی خولی شەشەمی پەرلەمانی كوردستان لە بازنەكانی هەولێر، سلێمانی، دهۆك و هەڵەبجە بەڕێوەچوو، تێیدا یەكێتیی نیشتمانیی كوردستان توانی ٤٠٩ هەزار و ٥٤٨ دەنگی بەدەستبهێنێت و ٢٣ كورسی پەرلەمان مسۆگەر بکات.