پێشبینى بۆندێکى ئاڵوگۆڕى لە نێوان هەردوو یانەى مانچێستەر یونایتد و ناپۆلى دەکرێت

یانەى مانچێستەر یونایتد، بەمەبەستى گەڕانەوەى یانەکەیان بۆ سەر رێچکەى سەرکەوتن و چنینەوەى نازناوە ناوخۆییەکانى ئینگلتەرا و پاشان چوونە سەر ستەیجى نازناوە گەورەکانى ئەوروپا، لە هەوڵى گۆڕانکاریدان و لەسەر داواى رۆبن ئەمۆریمى راهێنەرى نوێی یانەکە، هەوڵ بۆ گواستنەوەى یاریزانێکى یانەى ناپۆلى دەدەن.
رۆژنامەى دەیلى مەیلى بەڕیتانى ئاشکرایکردوە: راشفۆرد لە پلانەکانى راهێنەرى نوێدا نییە و هەوڵ بۆ فڕۆشتنى دەدرێت، هەروەها ئەمۆریم داواى لە ئیدارەى یانەى شەیتانە سورەکان کردوە، ڤیکتۆر ئۆسێمێنى یاریزانى یانەى ناپۆلى بگوازنەوە، کە ئێستا بە شێوازى خواستن لە ریزەکانى یانەى گەڵەتەسەراى تورکى یاریی دەکات.
دەیلى مەیل، ئاماژەى بەوەش کردوە: بەرپرسانى یانە ئیتاڵیەکە، سەرسامى خۆیان بە تواناکانى راشفۆردى تەمەن 27 ساڵان دەربڕیوە و پێشبینى دەکرێت، بۆندێکى ئاڵوگۆڕى لە نێوان هەردوو یانەکە ئەنجام بدرێت، بەڵام تا ئێستا هیچ گفتووگۆیەک لەو بارەیەوە ئەنجام نەدراوە و ئۆسێمێنی نەیجیریش، داواى لە بەڕێوەبەرى کارەکانى کردوە، هەرزوو یانەیەکى گەورەى لە ئەوروپا بۆ بدۆزێتەوە.
************