دەوڵەتی یاسا: بڕگەی تایبەت بە نەوتی هەرێم لە یاسای بودجەدا هەمواردەکرێتەوە

فیراس موسلیماوی پەڕلەمانتاری سەر بەهاوپەیمانی دەوڵەتی یاسا رایگەیاند، مادەی 12ی تایبەت بەهەناردەکردنی نەوتی هەرێم لەبودجەی سێ ساڵی داهاتوودا لەماوەی خولی داهاتوی یاساداناندا هەمواردەکرێتەوە، ئەوەش لەئەنجامی لێکتێگەیشتنی نێوان حکومەتەکانی ناوەند و هەرێم بەهۆی گفتوگۆیەکی درێژخایەنەوە.
موسلیماوی لەلێدوانێکی ڕۆژنامەوانییدا ڕونیکردوه‌تەوە، هەموارکردنەکە لەخولی داهاتوی یاساداناندا بەبێ کێشە تێدەپەڕێت‌ و ئەمەش ڕێگە بەحکومەتی فیدراڵی دەدات بۆ یەکەمجار کۆنترۆڵی هەناردەی نەوتی هەرێم بکات، جگەلەوەی ئەمەش هەنگاوێکی ئەرێنیەو ڕێگە خۆشدەکات بۆ دەرکردنی یاسای نەوت‌و گاز.
بەئاماژەدان بەوەی کە حکومەتی هەرێم، بۆ یەکەمجار، داهاتەکانی دەروازە سنورییەکانی ڕادەستی حکومەتی فیدراڵی کردوە.
ئەوەش لەکاتێکدایە، محەممەد شیاع سودانی سەرۆک وەزیرانی عێراق، لەمیانی میوانداریکردنی بۆ پەڕلەمان داوایکردبوو ئەو مادەیە هەمواربکاتەوە کە تایبەتە بەتێچوی بەرهەمهێنان‌و گواستنەوەی نەوتی هەرێم بۆ چارەسەرکردنی پرسی بەبازاڕکردنی نەوت.