كه‌شناسیی عێراق پێشبینیی بارانی به‌لێزمه‌و بای به‌هێزده‌كات

دەستەی کەشناسیی عێراق پێشبینییەکانی بۆ دۆخی کەشوهەوای رۆژانی داهاتوو بڵاوکردەوە و رایگەیاند:" بارانی بەلێزمەو بای بەهێز ناوچەکانی ناوەڕاست و باشووری عێراق دەگرێتەوە و لە رۆژی یەکشەممە شەپۆلەکە دەستپێدەکات و رۆژی سێشەممە کۆتایی دێت."

بەگوێرەی راگەیەندراوێكی كه‌شناسیی، ئەمڕۆ شەممە 4ی كانونی دووه‌می 2025 بەگشتی کەش لەنێوان نیمچە هەور بۆ هەوری تەواو دەبێت و لەئێوارەی رۆژی یەکشەممەوە باران و هەورەبروسکەی ناوبەناو دەستپێدەکات و تاوەکو رۆژی دووشەممە بەمشێوەیە بەردەوام دەبێت.

هۆشداریشیداوە کە رۆژی دووشەممە خێرایی با دەگاتە نزیکەی 60 کیلۆمەتر لەسەعاتێکدا، داوای ئامادەباشیی لایەنە پەیوەندیدارەکان دەکات بۆ رووبەڕووبوونەوەی هەر ئەگەرێکی نەخوازراو.

ئەم شەپۆلی بارانبارینە کە عێراق و سعودیە دەگرێتەوە، بەلاوازی کاریگەریی لەسەر چەند ناوچەیەکی باشووری هەرێمی کوردستان دەبێت و کاریگەرییەکەی بەتەواویی ناگاتە هەموو هەرێمی کوردستان.