چوار کەس بە تۆمەتی تیرۆریستی دەستگیر دەکرێن

بەرێوەبەرایەتی ئۆپەراسیۆنەکانی سەر بەدەزگای ئاسایشی هەرێم و دەزگای ئاسایشی نیشتمانی عیراق، ٤ کەس بە تۆمەتی تیرۆریستی دەستگیردەکەن، کە بە ماددەی ٤ی یاسای بەرەنگاربوونەوەی تیرۆر داواکرابوون.

ئەمڕۆ شەممە ٤-١-٢٠٢٥، دەزگای ئاسایشی نیشتمانی لە بەیاننامەیەکی رۆژنامەوانیدا ڕایگەیاند :” لەئەنجامی هەماهەنگی ئەمنی نێوان شانەی دژە تیرۆر لەدەزگای ئاسایشی نیشتمانیی و بەڕێوەبەرایەتی گشتی ئۆپراسیۆنەکانی دەزگای ئاسایش لە هەرێمی کوردستان، توانییان ٤ تیرۆریستی داواکراو بەپێی ماددەی چوارەمی یاسای بەرەنگاربوونەوەی تیرۆر دەستگیربکەن".

"لە لێکۆڵینەوەکاندا دەرکەوتووە کە  تیرۆریستییەکان بە ناسنامەی ساختەوە هاتوچۆیان کردووە و دوو کەسیان لە شوێنێکدا وەک تەکنیککار کاریان کردووە، کە بە (دەسەڵاتی گەشەپێدان و پیشەسازی سەربازی) ناسراوە و سەر بە باندە تیرۆریستییەکانی داعشن لە پارێزگای ئەنبار" لە راگەیەندراوەکە وادەڵێت.

 بەگوێرەی راگەیەندراوەکە دوو تۆمەتبارەکەی دیکە لە  نەینەوا و دیجلەن و بەشدارییان لە هێرشە تیرۆریستییە راستەوخۆکاندا دژی هێزە ئەمنییەکان و هاووڵاتیانی بێتاوان کردووە".