خراپی کەشوهەوا دەوامی لە چەند پارێزگایەکی عیراق راگرت

بەهۆی کەشوهەواوە لە چەند پارێزگایەکی عێراق بەڕێوەبەرایەتییەکانی پەروەردە دەوامیان راگرت.

ئەمڕۆ شەپۆلێکی چڕی بارانبارین بەشێک لە پارێزگاکانی عێراقی گرتەوە، بەو هۆیەوە ئەنجوومەنی پارێزگای دیوانییە بڕیاریدا دەوامی سەرجەم فەرمانگە و ناوەندەکانی خوێندن بکاتە پشووی رەسمی.

لای خۆیانەوە بەڕێوەبەرایەتییەکانی پەروەردەی بەغداد و بابل و  موسەننا بڕیاریاندا ئەمڕۆ دەوام لەسەرجەم ناوەندەکانی خوێندن رابگرن.

بەپێی پێشبینییەکانیش ئەو شەپۆلەی بەشێک لەناوچەکانی عێراقی گرتووەتەوە، سبەینێ کۆتایی دێت.

هاوکات کەشناسی هەرێم ڕایگەیاند، ئەمڕۆ ئاسمان پەڵە هەور بۆ ساماڵ دەبێت، بەڵام لە ناوچەکانی ڕۆژهەڵاتی هەرێم و گەرمیان نیمچە هەور دەبێت.

لە بارەی کەشوهەوای سبەینێشەوە کەشناسی هەرێم دەڵێت، ئاسمان ساماڵ دەبێت، لە هەندێ شوێن پەڵە هەور دەبێت، پلەی گەرما کەمێک بەرز دەبێتەوە بەراورد بە تۆمارکراوەکانی ئەمڕۆ.