فراکسیۆنەکەی سوودانی بەناوی (ئاوەدانکردنەوە و گەشەپێدان) لە پەرلەمانی عیراق راگەیەندرا

فراکسیۆنێکی نوێ بەناوی ئاوەدانکردنەوە و گەشەپێدان لە پەرلەمانی عیراق راگەیەندرا کە لە سوننە و شیعە پێکهاتووە و ژمارەیان نزیکەی 60 پەرلەمانتار دەبێت، محەمەد شیاع سودانی سەرۆکایەتی دەکات.
فیراس مەسلەماوی ئەندامی پەرلەمانی عێراق لەکۆنگرەیەکی رۆژنامەوانیدا کە لە باڵەخانەی پەرلەمان بەڕێوەچوو، رایگەیاند: فراکسیۆنەکەیان لەسەر بنەمای پڕۆژەیەک بۆ ئاوەدانکردنەوەی عێراق و بنیاتنانی سیستەمێکی سیاسی پێگەیشتوو، وەک پڕۆژەیەکی نوێی نیشتمانی دامەزرێنراوە.
وتیشی: سەقامگیریی و دابینکردنی خزمەتگوزاری و پێشکەوتنی عێراق بە ئاوەدانکردنەوەی ڕاستەقینە و گەشەپێدان و دابەشکردنی دادپەروەرانەی سامان دەستپێدەکات .
بەگوێرەی زانیارییەکان، ئەندامانی ئەو هاوپەیمانیێتیە لە هەردوو پێکهاتەی شیعەو سوننەن و ژمارەیان بە دیاریکراوی 52 پەرلەمانتارە.
هاوپەیمانێتی ئاوەدانکردنەوە و گەشەپێدان کە محەممەد شیاع سوودانی سەرۆکایەتی دەکات لە؛ ڕەوتی فوراتەین، و هاوپەیمانیی عەقدی نیشتمانی، و هاوپەیمانیی وەتەنییە، و هاوپەیمانیی ئیبداعی کەربەلا، و کۆمەڵەی وڵاتی سۆمەر، و کۆمەڵەی ئەجیال و هاوپەیمانیی چارەسەری نیشتمانی پێکهاتووە.