ئەنجومەنی نوێنەران دەیەوێت تەمەنی خانەنشینی بۆ ٦٣ ساڵ بگەڕێنێتەوە

وابڕیارە لەیەکەم دانیشتنی ساڵی نوێی ئەنجومەنی نوێنەراندا بڕگەیەکی یاسای خانەنشینی هەموار بکرێتەوە.

د. نەرمین مەعروف ئەندامی ئەنجومەنی نوێنەرانی عیراق لەفراكسیۆنی یەكێتی رایگەیاند: رۆژی یەکشەممە 12-1-2025 لەیەکەم دانیشتنی ئەنجومەنی نوێنەران کە دانیشتنی ژمارە 1ـی وەرزی یەکەمی یاسادانانە یاسای خانەنشینی یەکگرتوو کە ژمارە 9ـی ساڵی 2014ە، بڕگەی پێنجەمی هەموار دەکرێتەوە".

وتیشی: خاڵی سەرەکی هەموارەکە تایبەتە بە تەمەنی خانەنشینی و پێشنیازەکە بۆ ئەوەیە تەمەنی خانەنشین بوونی فەرمانبەران لە کەرتی گشتی بکرێتەوە بە 63 ساڵ کە لە ئێستادا و بەهۆی هەمواری یەکەمی یاساکە لە ساڵی 2019 کراوەتە 60 ساڵ.