سوپای ئیسرائیل لە باکووری کەرتی غەززە دەست بە کشانەوە دەکات

میدیا ئیسرائیلییەکان بڵاویانکردەوە، هێزەکانی ئیسرائیل دەستیان بە کشانەوە لە ناوچەی نەتسەریم لە باکووری کەرتی غەززە کردووە.
ئەمڕۆ لە چوارچێوەی قۆناغی یەکەمی ئاگربەستی ئیسرائیل و حەماس، سوپای ئیسرائیل وردە وردە دەست بە کشانەوە لە ڕۆژئاوای ناوچەی نەتسەریم، لە باکووری کەرتی غەززە دەکات تاوەکوو ڕێگە بە گەڕانەوەی هاووڵاتییان بدات بگەڕینەوە بۆ ماڵ و شوێنی نیشتەجێبوونیان.
سوپای ئیسرائیل هۆشداریدا لە گواستنەوەی چەکداران یان چەک لەم ڕێگایانەوە بۆ باکووری کەرتی غەززە و ڕایگەیاند  ئەمە  پێشێلکردنی ڕێککەوتنەکەیە.
ئامادەکارییەکانی وەزارەتی تەندروستی غەززە لە شەقامەکانی غەززە تەواوکراون بۆ پێشوازیکردن لە ئاوەرەکان و دڵنیابوون لە تەندروستییان، هاوکات ڕێگە بە هاوکارییە مرۆییەکان دەدرێت بۆ چوونە ناو کەرتی غەززە.
ڕۆژی 15-1-2025، دوای 15 مانگ شەڕ لە نێوان ئیسرائیل و حەماس ئاگربەست لە غەززە، بە نێوەندگیری میسر و قەتەر و ئەمریکا ڕاگەیێنرا.