نوسینگەی نەتانیاهۆ: رێگە بە گەڕانەوەی ئاوارەکان بۆ باکووری غەزە دەدەین

هەر لەچوارچێوەی ئاگربەستی غەززەدا، نووسینگەی سەرۆکوەزیرانی ئیسرائیل دەڵێت، رێگە بە گەڕانەوەی ئاوارەکان دەدەن بۆ باکووری کەرتی غەززە و رۆژی پێنجشەممەش حەماس ژمارەیەک بارمتەی دیکەی ئیسرئیل ئازاد دەکات.
لە راگەیەندراوێکدا نوسینگەی نەتانیاهۆ ئاماژەی بەوە کردووە، لە چوارچێوەی رێککەوتنی ئاگربەستی غەزە و ئازادکردنی بارمتەکان، رۆژی پێنجشەممە، حەماس ژمارەیەک بارمتە ئازاد دەکات لە نێویاندا، ئەربیل یەهود و ژنە سەربازی ئیسرائیلی ئاگام بیرگر و ژمارەیەک بارمتەی دیکە.
لەبەرامبەردا ئیسرائیل لە ئەمڕۆ دووشەممەوە رێگە بە گەڕانەوەی ئاوارەکان دەدات بۆ باکووری کەرتی غەزە.
قسەکانی نووسینگەی نەتانیاهۆ لەبارەی گەڕانەوەی ئاوارەکان لە کاتێکدایە، دۆناڵد ترەمپ سەرۆکی ئەمریکا رایگەیاندبوو، بیرۆکەی ئەوەی هەیە کە خەڵکی غەزە بۆ میسر و ئوردن بگوازێتەوە.