ئەمریکا ئاگربەستی لوبنان و ئیسرائیل درێژدەکاتەوە

دوای تەواوبوونی وادەی ئاگربەستی 60 ڕۆژەی نێوان ئیسرائیل و حیزبوڵڵای لوبنان، کۆشکی سپی ئاگربەستەکە تا مانگی داهاتوو درێژدەکاتەوە.
کۆشکی سپی لەو بارەیەوە ڕایگەیاند، ڕێککەوتنی ئاگربەستی نێوان ئیسرائیل و لوبنان تاوەکو 18ـی شوبات کاری پێدەکرێت، هاوکات دانوستان سەبارەت بە گەڕانەوەی ئەو هاووڵاتییە لوبنانییانەی لە 7ـی ئۆکتۆبەرەوە دەستبەسەرکرابوون لەگەڵ هەریەکە لە حکومەتی ئەمریکا، ئیسرائیل و لوبنان دەستپێدەکاتەوە.
بەهۆی شەڕی لوبنانەوە، نزیکەی چوار هەزار هاووڵاتی لوبنان بەهۆی بۆردوومانەوە کوژراون و زیاتر لە یەک ملیۆن هاووڵاتیش ئاوارەبوون، لەگەڵ ڕاگەیاندنی ئاگربەستی 60 ڕۆژە بەگوێرەی خاڵەکانی ڕێککەوتنەکە پێویست بوو حیزبوڵلا چەک دابنێت و ئیسرائیلیش هێزەکانی لە باشووری لوبنان بکشێنێتەوە.
لە 23 ئەیلوول 2024، هێزی ئاسمانی ئیسرائیل هێرشیکردەسەر باشووری لوبنان و وێرانکاری ڕووی لەو ناوچەیە کرد، دوای چەندین هەوڵی ناوخۆیی و دەرەکی ئاگربەست لە 27-11-2024، لە نێوان حیزبوڵڵا و ئیسرائیل ڕاگەیێنرا، دوێنێش ڕێککەوتنی 60 ڕۆژەی ئاگربەست بەڕەسمی کۆتاییهات.