سودانی: رێگەی گەشەپێدان هێڵی گواستنەوەی نەوت و گازیشی تێدایە

کۆنفرانسی وزەی عێراق لە بەغدا بەڕێوەدەچێت و پرسی ژینگە، سەرچاوەکانی وزە تەوەرە سەرەکییەکانی کۆنفرانسەکەن.
لە کۆنفراسەکەدا محەممەد شیاع سودانی، سەرۆکوەزیرانی عێراق وتارێکی پێشکەش کرد و رایگەیاند، تاوەکو پێنج ساڵی دیکە، 40%ی نەوت بۆ پیشەسازیی گۆڕاو بەگەڕ دەخەن و لە نەخشەی پڕۆژەی رێگەی گەشەپێداندا هێڵی گواستنەوەی نەوت و گازیان داناوە.
راشیگەیاند لە بەرهەمهێنانی سووتەمەنەییەکاندا نزیکین لەوەی پشتبەخۆمان ببەستن کارمان لەسەر ئەوەکردووە زیاتر سوود لە سامانی نەوت و وەبەرهێنانی گازی سروشتی و زیادکردنی بەرهەمهێنانی بەرهەمە نەوتییەکان وەربگرین.
بەگوێرەی پلانی وەزارەتی نەوتی عێراق، تاوەکو کۆتایی ئەم ساڵ سووتانی گازی هاوەڵی کێڵگەکانی نەوت 80% رادەگیرێت و لە کۆتایی 2027 بەتەواوی سووتانی ئەو گازە رادەگیرێت کە لەگەڵ دەرهێنانی نەوت دەسووتێت و یەکێک لە هۆکارەکانی پیسبوونی ژینگەیە.