ساڵانه رێژه‌ی جیابوونه‌وه‌ی هاوسه‌ران له‌عیراق له‌هه‌ڵكشاندایه‌وه زۆرترین رێژه‌ش ساڵی رابردوو تۆماركراوه كه زیاتر له 72 هه‌زاره‌و پسپۆڕ‌انیش هۆكاره‌كه‌ی بۆ لایه‌نی كۆمه‌ڵایه‌تی و دارایی و تۆڕ‌ه‌كۆمه‌ڵایه‌تییه‌كان ده‌گێڕ‌نه‌وه.
به‌پێی ئامارێك كه رۆژنامه‌ی سه‌باح-ی زمانحاڵی حكومه‌تی عیراق بڵاویكردۆته‌وه، له ساڵی رابردوودا 72 هه‌زار حاڵه‌تی جیابوونه‌وه له عیراق تۆمار كراون، به‌مه‌ش هه‌شت سه‌عات جارێك هاوسه‌رگیرییه‌ك هه‌ڵوه‌شاوه‌ته‌وه.
ریا قه‌حتان توێژه‌ری كۆمه‌ڵایه‌تی به رۆژنامه‌كه‌ی وتووه:"تۆڕ‌ه كۆمه‌ڵایه‌تییه‌كان رۆڵێكی خراپ له‌هه‌ڵوه‌شاندنه‌وه‌ی خێزانه‌كان ده‌گێڕ‌ن، چونكه له‌و تۆڕ‌انه‌دا ژیانێكی نموونه‌یی خێزانیی دوور له راستی نیشانده‌درێت، كه خێزانه‌كانیش ده‌یانه‌وێت هاوشێوه‌ی ئه‌و ژیانه بن كه‌له راستیدا بوونی نیه، ئه‌مه جگه له‌وه‌ی گرنگی به‌و ژنانه ده‌درێت كه جیابوونه‌ته‌وه و وه‌ك كه‌سانی ئازادتر نیشانده‌درێن".
" هێنانی كلتوری گه‌لانی دیكه بۆ ناو كۆمه‌ڵگه‌ی عیراق و كێشه‌ی دارایی و ده‌ستوه‌ردان له‌كاروباری خێزانه‌كان و خیانه‌تی هاوسه‌رگیری، كۆمه‌ڵێك هۆكاری دیكه‌ی جیابوونه‌وه‌ی هاوسه‌رانن" ریا قه‌حتان وا ده‌ڵێت.
له‌كۆتایشدا ئه‌و توێژه‌ره ده‌ڵێت:"پێویسته هۆشیاری خێزانی به هاوسه‌ران بدرێت، بۆ ئه‌وه‌ی بتوانن پێكه‌وه كێشه‌كانی نێوانیان چاره‌سه‌ر بكه‌ن".
بڵاوكردنه‌وه‌ی ئه‌م ئاماره له‌كاتێكدایه، كه ساڵانه رێژه‌ی جیابوونه‌وه‌ی هاوسه‌رگیری له‌عیراق له هه‌ڵكشاندایه، به‌شێوه‌یه‌ك له ساڵی2023 دا زیاتر له 71 هه‌زار حاڵه‌ت تۆمار كراوه، به‌مه‌ش له‌ماوه‌ی چوار ساڵی رابردوودا زیاتر له 357 هه‌زار حاڵه‌تی جیابوونه‌وه‌ی هاوسه‌ران له‌عیراق تۆمار كراون، كه زۆرترینیان له‌ساڵی رابردوودا بووه.
Copyright © 2020 Kirkuk Tv All Rights Reserved Designed And Developed By AVESTA GROUP