وەزارەتی دارایی عێراق: هیچ پەیوەندییەکمان بە دواکەوتنی مووچەی فەرمانبەرانی هەرێمەوە نییە

وەزارەتی دارایی عیراق لە روونکردنەوەیەکدا رایدەگەیەنێت: وەزارەتەكەیان هاوشێوەی پارێزگاكانی تری عیراق مامەڵە لەگەڵ دۆسیەی موچەی موچەخۆرانی هەرێم دەكات و هیچ پەیوەندییان بە دواكەوتنی موچەوە نییە.
ئاشکرایشیدەکات: زیاتر لە ساڵێكە هەوڵ دەدەن بڕیاری دادگای فیدراڵی لەبارەی بە بانكیركردنی موچەی موچەخۆرانی هەرێم جێبەجێ بكەن، بەڵام تا ئێستا حكومەتی هەرێم هیچ داتایەكی لەوبارەیەوە نەداوەتە وەزارەتی دارایی عیراق.
لە روونکردنەوەکەشدا هاتووە: هۆکاری دواکەوتنی خەرجکردنی مووچەی فەرمانبەرانی هەرێمی کوردستان بۆ ئەوەدەگەرێتەوە، تاوەکو ئێستا حکومەتی هەرێمی کوردستان ناوی ئەو فەرمانبەرانەی لە لیستی مووچە جیا نەکردووەتەوە کە خانەنشین دەبن و بۆ چارەسەرکردنی بەپەلەی ئەو کێشەیەش وەزارەتمان تیمێکی لە فەرمانبەرانی بەشی بودجە و ژمێریایی ناردوە بۆ هەرێمی کوردستان و 10 رۆژ زیاترە لەگەڵ وەزارەتی دارایی هەرێمی کوردستان کار لەسەر جیاکردنەوەی ناوی ئەو کەسانە دەکەن کە خانەنشین دەکرێن.