سودانی: عیراق بەرەو گەورەترین جوڵە لە بواری نیشتەجێبوندا هەنگاودەنێت

محەمەد شیاع سودانی، سەرۆك وەزیرانی عێراق، لەمیانەی وتارێكدا لە 48ـەمین پێشانگای نێودەوڵەتی بەغدا ڕایگەیاند، "دەمانەوێت پێشانگای بەغداد ببێتە خاڵی کۆبونەوە، بەشێوەیەک دەرفەت و تێگەیشتن و پێشنیارەکان بۆ بەرەوپێشبردنی گەشەپێدان لە عێراق تێکەڵ بکرێن".
سودانی باسی لەوەشكرد، عێراق بەرەو گەورەترین جوڵەی شارستانی لە بواری نیشتەجێبوندا دەڕوات و کارکردن لەپڕۆژەکانی شارە نوێیەکان دەستیپێکردوە بۆ ئەوەی بگاتە نزیکەی ملیۆنێك یەکەی نیشتەجێبون.
ئەوەشیخستەڕو، پڕۆژەیەکیان ڕاگەیاندوە بۆ زیادکردنی 15 بۆ 20 هەزار مێگاوات بۆ بەرهەمهێنانی کارەبا بۆ تۆڕی نیشتمانی و بەرزکردنەوەی بەرهەمهێنان بۆ بەرزترین ئاست.
سودانی ڕونیكردەوە، "کارمانکرد بۆ بەدەستهێنانی بەشداری ڕاستەقینە لە پڕۆژەکانی بەرهەمهێنانی وزەی پاک و نوێبوەوە. هەروەها کەرتی تەندروستی دەرفەتێکی راستەقینەیە بۆ وەبەرهێنان پاش تەواوبونی دەیان پڕۆژەی دواکەوتو لە نەخۆشخانەکان و گرتنەبەری شێوازی بەڕێوەبردن و کارکردنی هاوبەش و چالاککردنی بیمەی تەندروستی".
دەشڵێت، "لەدوای جێبەجێکردنی چاکسازیەکان و  وەبەرهێنانی بیانی لە عێراق 60 ملیار دیناری تێپەڕاند، ئەمەش نیشانەیەکی ڕونی متمانەی سەرمایەیە، هەروەها ڕێگای گەشەپێدان (پڕۆژەی گەل) کاریگەرترین ڕێگا دەبێت بۆ بەیەکەوە بەستنەوەی ئاسیاو ئەوروپا كە بەناو عێراق و ڕۆژهەڵاتی ناوەڕاستدا تێدەپەڕێت.