سوپای ئیسرائیل رایگەیاند: خەڵک دەتوانن لە پەناگەکان بێنە دەرەوە

سەرچاوە فریاگوزارییەکان و سوپای ئیسرائیل رایانگەیاند، بەیانیی ئەمڕۆ سێشەممە، لە ئەنجامی هێرشێکی مووشەکیی ئێران لانیکەم 9 کەس لە ئیسرائیل کوژران. هێرشەکە کەمێک پێش ئەو کاتە بوو کە بڕیاربوو ئاگربەست  ڕابگەیەندریت .
خزمەتگوزاریی فریاکەوتنی ماگن داڤید ئادۆم لە پۆستێکدا لە تۆڕی کۆمەڵایەتیی ئێکس رایگەیاند، 3 کەس لە شوێنی هێرشەکە لە باشووری شاری بیئر سەبع گیانیان لەدەستداوە و دواتریش 6 لە بریندارەکانی هێرشەکە گیانیان لەدەستداوە.
 بەگوێرەی دەزگاکە، سێ کەس بریندار بوون، دووانیان برینەکانیان مامناوەندە و ئەوى دیکەش برینەکەى سووکە.
بەگوێرەی راگەیێندراوەکانی سوپای ئیسرائیل، لە بەرەبەیانەوە بۆ ماوەی نزیکەی دووسەعات زەنگی ئاگادارکردنەوە لە سەرانسەری ئیسرائیل لێدرا، لە کاتێکدا ئێران 6 شەپۆلی مووشەکیی ئاراستە کردبوو.
 نزیک سەعات 8:00ی بەیانی سوپای ئیسرائیل رایگەیاند، خەڵک دەتوانن لە پەناگەکان بێنە دەرەوە.
 زیانی هێرشەکانی ئێران بۆ سەر ئیسرائیل بە تەواوی نەزانران، بەڵام دەوترێ لانیکەم 50 مووشەک کەوتوونەتە خوارەوە و بەر لە هێرشەکانی ئەم بەیانییەش 24 کەس لە ئیسرائیل کوژراون.
بەگوێرەی سوپای ئیسرائیل، سیستمی بەرگریی ئاسمانیی ئەو وڵاتە زیاتر لە 500 مووشەک و نزیکەی 1000 فڕۆکەی بێفڕۆکەوانی ئێرانی خستووەتە خوارەوە.