کاروان یاروەیس: کۆکس و کوڵەجۆمان لەپیلانی شۆڤێنی دەرهێناو بۆ قەرەتەپەش لەهەوڵداین

کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق راگەیاند:"بڕیاری ژمارە (20052)  لەرۆژی 16ی7ی2025 لەبارەی بەقەزاکردنی ناحیەی قەرەتەپە سەرپێچیەکی ئاشکرای دەستور و یاسا بەرکارەکانی عیراقەو دژی سازانی سیاسی و پێکەوەژیانی پێکهاتەکانی سنوورەکەیە".
 وتیشی: لەچەند رۆژی رابردوودا، هەوڵەکانمان لە ناحیەی کۆکس و سەردانی کردنی مەیدانی و نارەزایی خەڵک و ئیدارات و لایەنە سیاسیەکانی سنورەکە و کۆکردنەوەی پشتیوانی 105 پەرلەمانتار و سەرۆکی فراکسیۆنە کوردستانی و عیراقیەکان و ئاراستەکردنی یاداشتێک بۆ سەرۆکایەتیەکانی عیراق، توانرا ناحیەی کۆکس و کوڵەجۆی زەنگاباد  لەپیلانەکە دەربکەین.
 ئاماژەی بەوەشکرد:"حکومەتە یەک لەدوای یەکەکانی عیراق لە دوای پەسەندکردنی دەستور لە 2005 نەک مەبەستیان نەبووە مادەی 140 جێبەجێ بکەن کەچی ئێستا بەپێچەوانەوە پێشێلی دەکەن".
ئەو پەرلەمانتارەی یەکێتی روونیشکردەوە:"ئەگەر بەقەزابوونی قەرەتەپە بچێتەسەر بۆ عەرەبی سوننە و دەستکاری باری دیمۆگرافی و جوگرافی و ئیداری ناوچەکانی مادەی 140 بکرێ ئەوە لەداهاتوودا مەترسی گەورەتر لەسەر چارەنوسی ئەو ناوچانە و کورد دروست دەبێت".
لە کۆتایشدا، بڕیاردەری فراکسیۆنی رایگەیاند:"هەموو لایەک دڵنیا دەکەینەوە لەهەوڵەکانمان بەردەوام دەبین چۆن کۆکس و کوڵەجۆمان دەرهێنا لەناو پیلانەکە ئاواش دەبێ کۆی پیلانی بەقەزاکردنی قەرەتەپە هەڵوەشێنینەوە".