بۆ بنەماڵە و كەسوكاری مامۆستا محسن عەلی ئەكبەر
بەداخێكی زۆرەوە هەواڵی كۆچی دوایی مامۆستا محسن عەلی ئەكبەرم بیست، مامۆستای دیار و رەسەنی قوتابخانەی تێكۆشان و كوردایەتی، پێشمەرگەی دێرین و مەوسوعەی كاری رێكخستن و نمونەی شۆڕشگێری راستەقینە.
جگە لە ئەزموونی پێشمەرگایەتی و شاخ، مامۆستا لەدوای راپەرینیش بەرجەستەی كەسایەتیەكی لێوەشاوە و بەتوانا بوو، لەسەرجەم وێستگەكانی كاركردنیدا شایەدی ئەوەی بۆ دەدرێت كە لێزان و سەركەوتوو بوو، ماوەیەك لەئەركی حكومیدا بەیەكەوە كارمان كرد، هاوكارێكی بەسەلیقە و عاقڵمەند، جێگەی متمانە و راوێژ بوو، لەژیانی رۆژانەشدا، لەدانیشتن و كۆڕی دۆستاندا كەمدویەكی جوانبێژ بوو، بۆیە بەكۆچی دوایی كەسێكی شایستە و تێكۆشەرێكی راستەقینەمان لەدەست چوو.
سەرەڕای پرسە و هاوخەمیم بۆ كەسوكار و بنەماڵە تێكۆشەر و بەڕێزەكەی، لە خوای گەورە داواكارم بەچاكەی خۆی لەگەڵی بكات و گیانی لەبەهەشتی نەمریدا ئاسودە بكات.
بەرهەم ساڵح
سەرۆك كۆماری عێراق
Copyright © 2020 Kirkuk Tv All Rights Reserved Designed And Developed By AVESTA GROUP