وەرزشکارانی کەرکوک ئومێدیان بە جەنابی محافزە

هەڵوێست زوهێر
21:34 - 2024-11-05

لە ماوەکانی رابردوودا، لەگەڵ بەڕێز رێبوار تەها پارێزگاری کەرکوک، گفتووگۆیەکمان سەبارەت بە یاریگای ئۆڵۆمپی کەرکوک ئەنجامدا، پێیم وت، جەنابی پارێزگار چەندین ساڵە وەرزشکاران چاوەڕوانی کردنەوەی ئەم یاریگایەن، چی هەوڵێک لە لایەن بەڕێزتانەوە دەبێت، لە وەڵامدا وتی: دڵنیات دەکەمەوە لە سەردەمی ئێمەدا یاریگای ئۆڵۆمپی کەرکوک تەواو دەکرێت، هۆکاری تەواو نەکردنیشی گەندەڵی و جیاکاری بوە، خۆتانش دەزانن یاریگاکە لە چی شوێنێکە. 

لە دوای گفتووگۆکەی من و جەنابی پارێزگار، سەردانی بەغدادی پایتەختی کرد، لەگەڵ ئەحمەد موبەرقع، وەزیری وەرزش و لاوانی عێراق کۆبۆوە و گفتووگۆیان لە بارەی تەواوکردنی کارەکانیەوە ئەنجامدا، لە ناو ئەم هەفتەیەشدا کارەکانی نۆژەنکردنەوە و تەواو کردنی دەستیپێکرد و بەپێی پێشبینیەکان بۆ ساڵی داهاتوو یاریگای ئۆڵۆمپی کەرکوک، رادەستی وەرزشکاران دەکرێت. 

یاریگای ئۆڵۆمپی کەرکوک، لە ساڵی 1982 دروستکراوە و جێگای 24 هەزار هاندەر دەبێتەوە، لە دوای ساڵی 2003 500 خێزانی کورد کە ئاوارەی شارەکانی کوردستان ببوون، گەڕانەوە کەرکوک و لەوێ نیشتەجێبوون، لە ساڵی 2009 بە فەرمانی رەوانشاد سەرۆک مام جەلال، ئەو 500 خێزانە بە بڕی 20 ملیۆن دینار قەرەبوو کرانەوە، تا دەست بکرێت بە دووبارە نۆژەنکردنەوە و دیزاینکردنی یاریگاکە، بەڵام چەندین کابینەی یەک لە دوای یەکی حکوومەتی عێراق، چەندین بەڵێنی باق و بریقیان بە وەرزشکارانی شارەکەدا و لەگەڵ هاتنی وەزیرەکان، ئاژەڵ لە بەردەمیان سەردەبڕا، چەندین یاریگای دیکە لە عێراق دروستکران، بەڵام ئەم یاریگا ئۆڵۆمپیەی کەرکوک تەواو نەکرا، لە ئێستادا وەرزشکارانی کەرکوک دڵخۆشن بەو هەوڵەی بەڕێز رێبوار تەها پارێزگاری کەرکوکیەکان و وەرزشکاران، کە لەسەردەمی جەنبیاندا کارەکانی یاریگاکە تەواو بکرێت. 

لە چەند ساڵی رابردوودا، رەزامەندی ئەنجامدانی پاڵەوانێتیەکی نێودەوڵەتی وەرگیرابوو لە کەرکوک ئەنجام بدرێت، بەڵام بەهۆی تەواو نەبوونی کارەکانی ئەم یاریگایەوە، پاڵەوانێتیەکە ئەنجام نەدرا، ئەم یاریگایە دەبێتە فاکتەرێک بۆ پێشکەوتنی وەرزشی کەرکوک و بەڕێوەچوونی پاڵەوانێتیەکانی عێراق و رۆژ ئاوای ئاسیا و عەرەب لە شارەکەدا.

Copyright © 2020 Kirkuk Tv All Rights Reserved Designed And Developed By AVESTA GROUP