دیداری یەكێتی دیدارێك بۆ بوژاندنەوەی ژیانی رێکخراوەیی

یەكێك لە هێزە گەورە و كاریگەرەكانی سەر گۆڕەپانی كوردستان، لەو هێزانەی، كە توانای خۆگونجان و سازانی لەگەڵ روداو و پێشهاتە سیاسییەكان هەیە و هەمیشە لەسەر بنەمای قۆناغەكان دەتوانێت خۆی بگونجێت یەكێتیی نیشتمانیی كوردستانە، هێزێكە دەتوانێت و دەیەوێت بۆ هەموو سەردەم و كاتێك دەنگ و قسەی هەبێت و سەدای لەسەر گۆڕەپانەكە بیستراو بێت.
ئەو یەكێتیە بێ وێنەیەی مێژوو، نەك هەر لە شار، بەڵكو لە خەباتی شاخیشدا بواری نوێگەری و رەخنە و پێداچوونەوەی هەڵبژاردوە و هەرگیز ئاستەنگی لەبەردەم خۆتازەكردنەوە دروست نەكردووە، بەردەوامیش دەرگای رەخنەو ئاڵوگۆڕی بۆچوون ‌و ڕای جیاواز لەناو ئەو هێزەدا رەنگی داوەتەوە، ئەم كاریگەرییە ئەرێنیە لە سیاسەت و ئایدیاكەیدا لەدوای ڕاپەرینیش بەهەمان شێوە هەر هەبووە و بووەتە ستراتیژ و نەریتی یەكێتی، بەدڵنیاییەوە لە كاری ڕێكخراوەیشدا چەندین نوێگەری و داهێنانی كردوە، ئەم داهێنانە سیاسی و رێكخراوەییانەش كاریگەری و رەنگدانەوەی گەورەی هەبووە لە حكومڕانیدا، دوا وێنەی ئەو نوێگەریەش لە كاروباری حزبیدا (دیداری یەكێتی)ە، كە یەكێكی ترە لەو هەنگاوە ئەرێنیانەی بۆ پێداچوونەوە بە شێوازی نوێی كاركردن لە نێو یەكێتیی نیشتمانیی كوردستان سەریهەڵداوە، ئەم وێستگەیە دەرگایەكی كراوەیە بۆ تەواوی كادرانی یەكێتی، كە لەچوارچێوەی شێوە كۆنفرانسدا لەسنورە جیاجیاكانەوە، هەڤاڵان دەتوانن لەرێگەی ئەو دیدارەوە سەرنج و رەخنە و پێشنیار و تێبینیەكانی خۆیان بگەیەننە ئاستە باڵاكانی بڕیاردەری سیاسی حزب و لەسەرو هەموویانەوە سەرۆك بافڵ جەلال تاڵەبانی، بۆ ئەوەی سەرۆك و تیمی سەركردایەتی بەشێوەیەكی راشكاوانە گوێ لە هەڤاڵان بگیرێت.
بایەخی دیداری یەكەم و ئێستاش دیداری دووەم لەوەدایە، كە  پێشنیاركردنی شێوازی نوێی كاركردن و خستنەڕووی بیری نوێ دەكات بە سەرچاوەیەكی گرنگی ژیانی حزبایەتی، بەمەرجێك ئەم تێڕوانین و دیدگا نوێیانە لەچوارچێوەی سیاسەت و ستراتیژیەتی یەكێتیی نیشتمانیی كوردستاندا بێت، بەدڵنیاییەوە دیداری یەكێتی دەرفەتێكی گونجاو و لەبارە بۆ ئەو هەڤاڵانەی بە هەر جۆرێك لەجۆرەكان بێت، كە زوویر و نیگەران و دڵگران، جارێكی دیكە یەكێتی دەرگایان بە روودا بكاتەوە و لە چوارچێوەی دیسپلینی راستەقینەدا دەردەدڵ و نیگەرانی و رەخنەكانیان نەك هەر دەرببڕن، بەڵكو بكرێنە راسپاردە و پێشنیاری بەجێ بۆ باشتركردنی ئۆرگانەكان، هەڵبەت بەشێوازێكی نوێ و تێكەڵكردنی بیری نوێ و بەئەزموونەكان دەبێت بە قۆناغێكی نوێ لە داڕشتنەوەی دەستوورێكی نوێی حزب، كە دەنگ و رەنگی هەموو هەڤاڵێكی یەكێتی تێدا بێت.