بیدوێنە شەرحی خۆی دەکا

کورد وتەنی بیدوێنە شەرحی خۆی دەکا
لاوێن ئەبو زێد

کەمال کەرکوکی بەناوی پارتییەوە دەڵێت
مەحاڵە رێگە بە یەکێتیی بدەین جارێکی تر پۆستی پارێزگای کەرکوک وەربگرێتەوە

‎ئەو قسەیەی کەمال کەرکوکی هەر کەسێکی تر بیکردبایە دەیان بوختان و وەڵام و وەڵام کاری لێدەکەوتەوە و پارتیەکان بە درۆیان دەخستەوە و وایان نیشان دەدا کە ئەوەندە لە خەمی کەرکوک و کەرکوکیەکانن ئەوەندە بەرپرسانە مامەڵە لەگەڵ مەسەلەی کەرکوک دەکەن کە ئەوان هەموو هەوڵێکیان بۆ ئەوەیە پارێزگاری کەرکوک کوردبێت گرنگ نیە چ لایەنێکە . 

‎کەمال کەرکوکی باسی زۆرترین دەنگی کەرکوک دەکا بێ ئاگا لەوەی کە ژمارەی کورسیەکانی یەکێتی نیشتیمانی کوردستان لە هەموو هەڵبژاردنەکانی ڕابردووی ئەنجومەنی نوێنەرانی عێراق لە  ژمارەی کورسیەکای پارتی زیاترە ، باشە ئەگەر وایە بۆ لە کوردستان لافی زۆرترین ژمارەی کورسی لێدەدەن و بەم نەفەسەوە دانوستان لەگەڵ لایەنە سیاسیەکان دەکەن بەڵام لە کەرکوک باسی ژمارەی دەنگی کاندید دەکەن دیارە بانێک و دوو هەوایە ، دڵنیام کەمال کەرکوکی ئەوەندە بێ ئاگا نیە و ئەوەندەش کەم ئەزمونی سیاسی نیە نەزانێ ژمارەی کورسی حوکم دەکا نەوەک ژمارەی دەنگی کاندید 

‎ئەویش ژمارەی ئەندامی ئەنجومەنی پارێزگا پۆستی پارێزگار یەکلایی دەکاتەوە نەوەک ئەنجومەنی نوێنەران بەڵام کێ ئەو قسانەی پێدەکا اللە و اعلم ، ئەگەر پارتی و کەمال کەرکوکی لافی ئەوە لێدەدەن ژمارەی کورسیەکانی ئەندامانی ئەنجومەنی پارێزگایان زۆرە دەبێ ئەوەش بزانن کە لە کۆتا هەڵبژاردنی ئەنجومەنی پارێزگا لە کەرکوک یەکێتی و پارتی بە یەک لیست چونە هەڵبژاردنەوە و پارتی زیاتر لە نیوەی کورسیەکانیان بە دەنگی یەکێتی بە دەست هێنا ئەوەش زۆر ڕونە کە یەکێتی بەشێک لە ئەندامانی ئەنجومەنی پارێزگای کەرکوک یان چونە پەڕلەمانی عێراق و لە شوێنیان ئەندامانی پارتی شوێنیان گرتنەوە .