جێگری سەرۆکی هەرێم: هەنگاوەکانی یەکخستنەوەی هێزی پێشمەرگە خێراتر بکرێنەوە

جێگری سەرۆکی هەرێمی کوردستان جەخت لەیەکخستنەوەی هێزی پێشمەرگە دەکاتەوە.   
شێخ جەعفەر شێخ مستەفا جێگری سەرۆکی هەرێمی کوردستان پێشوازی لە  عەقید لارس پێرسیکۆڤیسکی فەرماندەی سەربازیی هێزی هاوپەیمانی ئەڵمانیا ووەفدێکی یاوەری کرد.
جێگری سەرۆکی هەرێمی کوردستان، ڕۆڵ و کاریگەریی هێزەکانی ئەڵمانیای لەچوارچێوەی هاوپەیمانی نێودەوڵەتی دژی داعش لەناوچەکە بەرزنرخاندو جەختی لەگرنگی هاوئاهەنگی زیاتری نێوان پێشمەرگە و سوپای عێراق، لەپێناو پاراستن و سەقامگیریی ئەو ناوچانەی کە بۆشایی ئەمنییان تێدایە، کردەوە.
سەبارەت بەپرۆسەی چاکسازیی و یەکخستنەوەی پێشمەرگەش، جێگری سەرۆکی هەرێمی کوردستان تیشکیخستەسەر هەنگاوەکانی ئەو پرۆسەیەو جەختی لەخێراکردنی ئەو میکانیزمانەی گرنگن بۆ خزمەتکردنی پرۆسەکە، کردەوە.
وەفدی میوانیش دووپاتیانکردەوە هێزەکانیان لەپاڵپشتی و هاریکارییە سەربازییەکانیان بۆ پێشمەرگە بەردەوامدەبن و بەگرنگییشەوە لەپرۆسەی چاکسازی و یەکخستنەوەی پێشمەرگە دەڕوانن.