بەشێکی زۆری ئەمریکاییەکان دەترسن وڵاتەکەیان دووچاری ئاژاوەگێڕیی ببێتەوە

ڕاپرسییەک ئاشكرای ده‌كات كه‌ ئەمریکاییەکان دەترسن وڵاتەکەیان بخزێتە ناو ئاژاوەگێڕییەوە، بەتایبەت دوای هەوڵی تیرۆرکردنی دۆناڵد ترەمپ.
لە ڕاپرسییەکەدا کە دوو ڕۆژی خایاندووە، دەرکەوتوە، ترەمپ کاندیدی کۆمارییەکان، پشتیوانی 43%ی بەشداربووانی ڕاپرسییەکەی وەرگرتوە، لە بەرامبەردا 41 % بۆ جۆو بایدن سەرۆکی ئێستای دیموکراتەکانە، ئەم جیاوازییە رێژه‌ییە ئاماژەیە بۆ ئەوەی کە هەوڵی تیرۆرکردنەکە کاریگەری لەسەر دەنگدەران نەبووە.
هاوکات 80%ی دەنگدەرانی بەشداربووی ڕاپرسییەکە، لە نێویاندا دیموکراتەکان و کۆمارییەکان، هاوڕان لەسەر ئەوەی کە "وڵاتەکەیان لە کۆنتڕۆڵ دەرچوە".
ڕاپرسییەکە بە ئۆنلاین بووە و هەزار و 202 کەسی پێگەیشتوو لە ئەمریکا بەشدارییان تێدا کردووە، نزیکەی 84%ی دەنگدەرانی بەشداربوو لە ڕاپرسییەکەدا ڕایانگەیاندووە، نیگەرانن لە کردەوەی توندڕەوەکان دوای هەڵبژاردن.