ئاماری توشبوون بە نەخۆشی کۆلێرا لەسەر ئاستی جیهان رادەگەیەندرێت

رێکخراوی تەندروستی جیهانی ئاماری توشبوون بە نەخۆشی کۆلێرا رایدەگەیەنێت کە  لەسەر ئاستی جیهان بەهەزارەها کەس تووشی ئەو نەخۆشییە بوونە.
رێکخروای تەندروستی جیهانی لە راگەیەندراوێکدا ئاشکرایکرد، لە 18 وڵاتدا تووشبوون و گیانلەدەستدان بەهۆی نەخۆشی کۆلێراوە تۆمارکراوەو دەرکەوتووە کە ژمارەی تووشبووان لە مانگی حوزەیران بەراورد بە مانگی ئایار بەرێژەی 14% کەمتر بووە.
هاوکات ئەوەشخراوەتەڕوو، 32 هەزار و 467 حاڵەتی نوێی تووشبوون لە ناوچەی رۆژهەڵاتی دەریای ناوەڕاست تۆمارکراون و نزیکەی 30 هەزار و 500 حاڵەتی دیکەش لە چەند وڵاتێکی ئاسیا و خۆرهەڵاتی ناوەڕاست تۆمارکراون.
ئەوەشی خستۆتەڕوو، بە گشتی ژمارەی تووشبوون بە کۆلێرا لە 1ی کانوونی دووەم تاوەکو 30ی حوزەیرانی 2024 لە 25 وڵاتدا تۆمارکراون و گەیشتووەتە 249 هەزار و 793 کەس.
پێشتر و لە مانگی کانونی دووەمی ساڵی 2023 رێکخراوی تەندروستیی جیهانی بڵاوبوونەوەی نەخۆشی کۆلێرای بە باری نائاسایی ئاستی سێیەم راگەیاند کە هاوتایە لەگەڵ پەرەسەندنی ئاڵۆزییەکان لە جیهاندا و نەبوونی پێکوتەی دژ بەو نەخۆشییە.