پەرلەمانی عێراق یاسای پاسپۆرتی دیبلۆماسی هەموار دەکاتەوە

ئەندامێکی ئەنجومەنی نوێنەرانی عیراق دەڵێت: هەمواری یاسای پاسپۆرتی دیبلۆماسی دەکرێتەوە ئەمەش دوای ئەو مشتومڕەی لەسەر یاساکە دروستبووە.
محەمەد شەمەری ئەندامی لیژنەی ئاسایش و بەرگری لە ئەنجومەنی نوێنەرانی عیراق رایگەیاند : لەدوای ئەو مشتومڕەی لەبارەی پێدانی پاسپۆرتی دیپلۆماسی دروستبوو، لیژنەکەمان دەستی بە لێکۆڵینەوە کر و دەرکەوت ئەو دەنگۆیانە بنەمایان نییەو تەنها هەزار و 600 کەس پاسپۆرتی دیپلۆماسییان هەیە کە ئەمەش ژمارەیەکی ئاساییە.
هاوکات ئاماژەی بەوەشکرد: لە لیژنەکەمان چەند بڕگەیەکی یاساکەمان هەموار کردووەتەوەو  پەسەندکردنیشی دەکەوێتە سەر تەواوی ئەندامانی ئەنجومەن لە کۆبوونەوەدا.
ئاشکراشیکرد: پێدانی پاسپۆرت بەو كەسایەتییانەی كە خزمەتی وڵاتیان كردووە بە درێژایی تەمەنیان لەگەڵ ئەندامانی خێزانەکانیان ئاساییە و نابێتە هۆی زیادبوونی ژمارەی پێدانی پاسپۆرتی دیپلۆماسی.